Zoom platformasy arqyly onlaın formatta ótken ǵylymı-tájirıbelik semınarǵa A.Baıtursynuly atyndaǵy Til bilimi ınstıtýtynyń dırektory Anar Fasyljan, ınstıtýttyń bas ǵylymı qyzmetkeri, f.ǵ.d., professor Nurgeldi Ýálı, ınstıtýttyń bas ǵylymı qyzmetkeri, f.ǵ.d., professor Aıman Aldash, f.ǵ.d., professor Quralaı Kúderınova, f.ǵ.k., ǵylymı qyzmetker Aınur Qarshyǵaeva, f.ǵ.d., dosent Qyzdarhan Rysbergen, professor Baǵdan Momynova, f.ǵ.k., jetekshi ǵylymı qyzmetker Sársenbaı Qulmanov, kishi ǵylymı qyzmetker Erkin Besirov, «Egemen Qazaqstan» RG» JShS bas dırektory Dıhan Qamzabekuly, bas dırektordyń orynbasary Qambar Ahmet jáne redaksııa tilshileri qatysty.
Eki saǵatqa sozylǵan mazmundy kezdesýde otandyq BAQ salasyndaǵy ózekti máseleler keń ári ashyq talqylandy. Sarapshylar gazet betterinde kezdesetin grammatıkalyq jáne stılıstıkalyq qatelerdi taldap, jýrnalısterdiń suraqtaryna jaýap berdi.
Semınar barysynda sóz sóılegen professor Aıman Aldashtyń aıtýynsha, búginde otandyq BAQ salasynda «Egemen Qazaqstan» gazeti aıryqsha bedelge ıe.
- «Egemen Qazaqstan» - pýblısıstıkalyq stılde qazaq sóziniń baılyǵy men tildiń ómirsheńdigin, áleýetin tanyp kele jatqan, tildi nasıhattaıtyn, emle normalary saqtalatyn, osy arqyly joǵary saýattylyqtyń ornyǵýyna mol úles qosatyn basylym», - dedi professor.
Aıman Aldash atap ótkendeı, jazba tilinde ornyqqan erejeler men emleler kúndelikti ómirde de durys saqtalmaıdy. Basylymdaǵy qateler oqyrmandardyń saýattylyǵyna tutas áser etedi. Sondyqtan jýrnalısterdiń saýattylyǵyn kóterý - qazirgi qoǵamdaǵy ózekti másele.
Budan soń, A.Baıtursynuly atyndaǵy Til bilimi ınstıtýtynyń Grammatıka bóliminiń meńgerýshisi, professor Baǵdan Momynova jýrnalıstermen tushymdy áńgime quryp, kalka aýdarý, mátindegi etıkany saqtaý, jalpy stılıstıka boıynsha usynystaryn aıtty.
Sondaı-aq konferensııa barysynda Til bilimi ınstıtýtynyń jetekshi ǵylymı qyzmetkeri Sársenbaı Qulmanov gazetterde termınderdiń qoldanylýy týraly baıandama jasady.
Aıta ketsek, bas basylym tilshilerine «Qazaq tiliniń ulttyq korpýsy» saıty tanystyryldy. Atalǵan saıtta qazaq tiliniń elektrondy mátindik qory jınaqtalǵan. Platformadan sóz boıynsha izdeý júrgizip, sol sóz qoldanylǵan sóılemderdiń tizimin jáne olardyń derekkózin kórýge bolady.
