Osylaısha bıznes jappaı jáne negizsiz ákimshilik jaýapkershilikke tartylady.
«Atameken» UKP salyq salý departamentiniń dırektory Jeńis Janbolatovanyń aıtýynsha, salyq organdary kásipkerlerdiń 1000 AEK-ten aspaıtyn somasy bar árbir mámilesine kúmán keltirýi másele bolyp tur. Salyq organdary mámilerdi bir mámilege biriktirip, Ákimshilik quqyq buzýshylyq týraly kodekstiń 266-babyn zańsyz qoldanyp, kásipkerlerge 1000 AEK somasy qolma-qol tólemmen asyp ketken jaǵdaıda mámile somasynyń 5% mólsherinde aıyppul túrinde ákimshilik jaýapqa tartqan.
«Mysaly, jalpy somasy shamamen 406 mln teńgege túrli tıptegi taýarlar jáne túrli merzimde 16 túrli jetkizýshilermen jasalǵan 178 derbes kelisimshartty bir mámilege biriktirý jaǵdaılary oryn alǵan. Al aıyppul 20 mln teńgeden astam somaǵa qoldanyldy. Jaǵdaı kún saıyn asqynyp barady. Shymkent kásipkerleri arasynda shıelenis údep keledi», deıdi Jeńis Janbolatova.
Spıker Ákimshilik quqyq buzýshylyq týraly kodekstiń 266-baby sýbekt esep aıyrysý kelisimsharttaryn buzýǵa jol bergen jaǵdaılarǵa, atap aıtqanda, 1 000 AEK somasynan asatyn qolma-qol aqshasyz tártippen esep aıyrysý úshin ǵana ákimshilik jaýapkershilikti kózdeıtinin aıtty. Demek ákimshilik quqyq buzýshylyq quramynyń shegi zańnamada kórsetilgen talapta ǵana qoldanylýy tıis.
Ákimshilik quqyq buzýshylyq týraly kodekstiń 2-babyna sáıkes, ákimshilik jaýaptylyqtyń negizi – kodekstiń erekshe bóliginde kózdelgen quqyq buzýshylyq quramynyń barlyq belgisin qamtıtyn is-áreket jasaý bolyp sanalady. Sondyqtan salyq organdary eseptegen buzýshylyqtar ákimshilik quqyq buzýshylyq quramyn túzbeıdi.
Osy erejege qaramastan memlekettik kiristerdiń aýmaqtyq organdary zańnama normalarynyń talaptaryn asyryp, mámilelerdi bólshekteý týraly negizsiz qorytyndylardy qoldana otyryp, keńeıtilgen túrde túsindiredi. Bul mámileler boıynsha azamattyq zańnamada da shekteý joq.
Nátıjesinde Azamattyq kodekstiń 2-babynda, sondaı-aq kásipkerlik sýbektileriniń isterine memlekettiń zańsyz aralasýyna jol bermeý týraly kásipkerlik kodekstiń 18-babynda bekitilgen kelisimsharttar derbestigi, jeke isterge bireýdiń óz betinshe aralasýyna jol bermeý, azamattyq quqyqty kedergisiz júzege asyrý qajettiligi týraly negizgi qaǵıdat buzylyp otyr.
Qazir bul másele «Atameken» Ulttyq kásipkerler palatasynyń jiti nazarynda tur.
