Máýlen Áshimbaev qazaqstandyqtardyń densaýlyǵyn jaqsartýda, densaýlyq saqtaýdyń sapasy men qoljetimdiligin arttyrýda Ulttyq neırohırýrgııa ortalyǵynyń róli zor ekenin aıtty. Bul sala memleketimizdiń áleýmettik saıasatynyń mańyzdy bóligi ekeni belgili.
Senat tóraǵasy aldaǵy ýaqytta elimizde osy salany damytý jumystary odan ári jalǵasa beretinin jáne medısınalyq qyzmetkerlerdi qoldaý úshin barlyq tıisti shara qolǵa alynatynyn atap ótti.
«Memleket basshysy densaýlyq saqtaý salasyna únemi basa mán berip keledi. Densaýlyq saqtaýǵa bólinetin qarjy kólemi de ulǵaıa beredi. Mindetti áleýmettik medısınalyq saqtandyrý júıesi jetildiriledi. Qazirgi tańda halyq tarapynan atalǵan saqtandyrý júıesine qatysty túrli synı pikir jıi aıtylyp júr jáne olar negizsiz emes. Búginde 3 mln-ǵa jýyq azamatymyz medısınalyq saqtandyrýdan tys qalyp otyr. Sondaı-aq aldaǵy ýaqytta dáriger mártebesi zańmen bekitiledi. Medısınalyq qyzmetkerlerdi qorǵaý jáne qoldaý sharalary kúsheıip, mamandyqtyń mártebesi arta túsedi. Memleket basshysynyń tapsyrmasymen jyl saıyn medısınalyq qyzmetkerlerdiń jalaqysyn ulǵaıtýǵa qatysty sharalar qabyldanyp jatyr», dedi M.Áshimbaev.
Atalǵan is-shara barysynda senatorlarǵa radıologııa jáne radıohırýrgııa bólimshesiniń jumysy týraly málimetter berildi. Munda zamanaýı «Gamma-pyshaq» kesheni ornatylǵan. Ol kúrdeli neırohırýrgııalyq ota jasaýǵa arnalǵan.
Ortalyq tóraǵasy Serik Aqsholaqovtyń aıtýynsha, «Gamma-pyshaq» isikterdi, qan tamyrlary men fýnksıonaldyq mı aýrýlaryn emdeý úshin qoldanylady. Bul jaǵdaıda mıdyń saý tinderi jáne naýqastyń búkil denesi sáýlelenbeıdi. Sonymen qatar depýtattarǵa gospıtaldyq farmasııa bólimshesiniń qyzmeti tanystyryldy. Onda emdeýdiń tıimdiligin jáne dárilik zattardy paıdalanýdyń utymdylyǵyn arttyrýǵa múmkindik beretin tehnologııalar bar.
Kezdesýge Áleýmettik-mádenı damý jáne ǵylym komıtetiniń músheleri Aqmaral Álnazarova jáne Baqytjan Jumaǵulov, elimizdiń Densaýlyq saqtaý mınıstri Ajar Ǵınııat, sondaı-aq ortalyqtyń qyzmetkerleri qatysty.
