World Cafe ınteraktıvti formatynda ótken dıalog alańyna Parlament, úkimettik emes sektor, sondaı-aq syrtqy ister, densaýlyq saqtaý, eńbek jáne áleýmettik qorǵaý, ádilet, ulttyq ekonomıka, ekologııa, geologııa jáne tabıǵı resýrstar mınıstrlikteri sııaqty memlekettik organdardyń ókilderi qatysty.
Senat depýtaty, Almaty qalasy múgedekter uıymdary qaýymdastyǵynyń tóraǵasy Lázzat Qaltaeva qatysýshylardy quttyqtap, Qazaqstanda azamattyq qoǵam men memleket dıaloginiń damýy geosaıası, ekonomıkalyq, ekologııalyq jáne áleýmettik syn-qaterler kezeńinde jańa dáýirge aıaq basqanyn atap ótti.
«Azamattyq qoǵamnyń sıpaty, qurylymy, onyń yqpal etý salasy ózgerdi. Bul ózgeristerdiń damýynyń mańyzdy faktory sıfrlandyrý, áleýmettik jeliler arqyly kóptegen aqparatqa qol jetkizý, ár adamnyń óziniń jeke stendin ınternette paıdalaný múmkindigin alý, demek jeke adam men qoǵam jáne memleket arasyndaǵy qashyqtyqty qysqartý. COVID-19 jáne pandemııamen baılanysty májbúrli oqshaýlaý, sodan keıin qańtar qasireti adamdarǵa buryn azamattyq qoǵamnyń bólek bolǵan ÚEU-ǵa jaqyndaýǵa múmkindik berdi. Bul qoljetimdilik búkil álemde jáne bizdiń elde azamattyq belsendiliktiń damýyna áser etti», dedi spıker.
Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet búginde memlekettiń ÚEU-men birge jumys isteıtin negizgi baǵyttaryn, atap aıtqanda, jergilikti ózin-ózi basqarý men azamattyq qoǵamdy damytý tujyrymdamasyna toqtaldy.
«2023 jyly azamattyq qoǵammen túrli bastamalardy talqylaý josparlanyp otyr. Mańyzdy usynymdar eskerile otyryp, olardy iske asyrýǵa tek mınıstrlik emes, barlyq memlekettik organdar da tartylady», dedi M.Qojahmet.
Konrad Adenaýer atyndaǵy qordyń Qazaqstandaǵy ókildiginiń dırektory Iohannes Raı «halyq únine qulaq asatyn memleket» tujyrymdamasyn talqylaý men dıalogtiń mańyzdylyǵyna toqtalyp, Germanııadaǵy memleket pen jurtshylyq arasyndaǵy ózara is-qımyldy damytý tájirıbesimen bólisti. Al AQDQ atqarýshy dırektory Jámıla Asanova kommersııalyq emes uıymdardyń kóshbasshylary memlekettik organdarmen dıalogtiń jańa tetigin qalyptastyrýy qajet ekenin aıtty.
Dıalog alańynyń qorytyndysy boıynsha usynystar ázirlenip, pikirtalas alańyna qatysýshylar Qazaqstandaǵy azamattyq qoǵamdy damytýdyń mańyzdy suraqtaryna jaýap tabýǵa tyrysty. Úkimettik emes sektordy damytýǵa arnalǵan konferensııanyń birqatar negizgi spıkeriniń baıandamalaryn uıymdastyrýshylar 2023 jyldyń basynda jaryq kóretin «Qazaqstandaǵy azamattyq qoǵam: ishki kózqaras» jınaǵynda biriktirýdi josparlap otyr.
