Almatyda shahmattan rapıd jáne blısten álem chempıonaty máresine jetti. Bir apta boıy Alataý bókterin dúbirge bólegen shahmat dodasyn Halyqaralyq shahmat federasııasy (FIDE) men Qazaqstan shahmat federasııasy uıymdastyrdy. Álem chempıonatyna 46 memleketten 178 er men 98 áıel qatysty. Dúnıejúziniń eń tańdaýly grossmeısterleri jınalǵan álemdik dodanyń barlyq chempıondary anyqtaldy. Elimizdiń úmiti Bıbisara Asaýbaeva orasan zor nátıje kórsetip, blısten álem chempıony atandy. Ol byltyr Polsha elinde de blısten álem chempıonatynda jeńiske jetken bolatyn. Bıbisara shahmattan eki dúrkin álem chempıony.
Jyldam shahmattan ıaǵnı rapıdten Dınara Sádýaqasova kúmis medal oljalady. Rapıd boıynsha norvegııalyq Magnýs Karlsen 13 týrda 10 upaı jınap álem chempıony ataǵyn qorǵaı bildi. Kúmis medal 18 jastaǵy nemis shahmatshysy Vınsent Keımerdiń qanjyǵasynda ketti. Qola medaldi amerıkandyq Fabıano Karýana oljalady. Rapıdten qyzdar arasynda qytaılyq Tan Chjýnı ıelendi. Kúmis bizdiń shahmatshymyz Dınara Sádýaqasovaǵa, qola medal úndistandyq Shrı Savıtaǵa buıyrdy.
Blısten álem chempıonatynyń fınaldyq oıyndardyń sımvolıkalyq júrisin bastap berý qurmeti Almaty oblysynyń ákimi Marat Sultanǵazıevke, Qazaqstan shahmat federasııasynyń prezıdenti Ǵalym Husaınovqa, «Tıolaın» kompanııasynyń atqarýshy dırektory Vıktor Dolgalevke buıyrdy.
Arnaıy ótkizilgen baspasóz máslıhatynda chempıonat dırektory, Qazaqstan shahmat federasııasynyń vıse-prezıdenti Dármen Sádýaqasov jeńimpazdar men júldegerlerge arnaıy shahmat federasııasynyń tapsyrysymen jasalǵan kýbok, medaldarmen marapattady. Erler arasyndaǵy blıs týrnırde Magnýs Karlsen álem chempıony atansa, kúmis medal amerıkandyq Hıkarý Nakamýraǵa, qola júlde armıan Haık Martırosıanǵa buıyrdy. Magnýs úlken eńbekpen jetken álem chempıony ataǵyn qorǵaý úshin tynymsyz daıyndyq júrgizgenin aıtty. Ol tipti Shymbulaqta shańǵy da teýip, Alataýdyń aýasy men álem chempıonatynyń aýrasy erekshe shabyt bergenin atap ótti.
Qyzdar arasynda blısten kúmis medal úndistandyq Hampı Konerýge, qola júlde Polına Shývalovaǵa (FIDE) buıyrdy.
Baspasóz máslıhatynda Bıbisara Asaýbaeva elimizde ótken álem chempıonatynyń jaýapkershiligi óte joǵary bolǵanyn jetkizdi. Bıbisara óziniń jeńisi keleshekte elimizdiń shahmat sporty órkendeýine septigin tıgizetinine senim bildirdi.
