Álıhan Smaıylov Premer-Mınıstr Keńsesin Úkimet apparaty retinde qaıta qurý Memleket basshysy bastamashylyq etken ınstıtýsıonaldyq reformalardyń mańyzdy elementi bolyp tabylatynyn atap ótti. Onyń aıtýynsha, ortalyq jáne jergilikti atqarýshy organdardyń jumysyn, qurylymdyq ózgeristerdi jalpy úılestirý kúsheıtiledi.
«Ol úshin apparattyń qurylymy men onyń qyzmeti ońtaılandyrylady. Úkimet pen Premer-Mınıstrdiń saraptamalyq-taldamalyq, uıymdastyrýshylyq-quqyqtyq qyzmetin qamtamasyz etý kúsheıtiledi. Apparat Prezıdent Ákimshiligimen birlesip sheshim qabyldaý rásimderin bıýrokratııadan aryltý jáne shamadan tys reglamentteýdi joıý jónindegi jumysty jalǵastyrady», dedi Álıhan Smaıylov.
Úkimet Apparaty basshysynyń m.a. Ǵalymjan Qoıshybaev vedomstvonyń jumysy bıýrokratııadan aryltý, «halyq únine qulaq asatyn memleket» jáne ortalyqsyzdandyrý, sondaı-aq memlekettik basqarý deńgeıleri arasynda ókilettikterdi qaıta bólý qaǵıdattaryna negizdeletinin habarlady.
Premer-Mınıstr ókilettikterdi memlekettik basqarý deńgeıleri arasyndaǵy ortalyqsyzdandyrý týraly zań jobasy Prezıdent Ákimshiligine kelisýge engizilgenin eske saldy.
Úkimettiń 500-den astam fýnksııasy mınıstrlikter men ákimdikterge beriledi.
«Atalǵan zań jobasymen biz mınıstrler men olardyń orynbasarlarynyń derbestigin kúsheıtemiz. Endi barlyq aǵymdaǵy salalyq máseleler mınıstrlerdiń buıryqtarymen qabyldanatyn bolady», dedi ol.
Kún tártibindegi ekinshi máselege toqtalǵan Premer-Mınıstr Prezıdenttiń Jarlyǵymen Ekologııa, geologııa jáne tabıǵı resýrstar mınıstrligi Ekologııa jáne tabıǵı resýrstar mınıstrligi bolyp qaıta uıymdastyrylǵanyn aıtty. Jer qoınaýyn geologııalyq zerdeleý jáne mıneraldyq-shıkizat bazasyn molyqtyrý salasyndaǵy fýnksııalar men ókilettikter Indýstrııa jáne ınfraqurylymdyq damý mınıstrligine berildi.
«Indýstrııa jáne ınfraqurylymdyq damý mınıstrliginiń basty mindetteriniń biri jer qoınaýyn ıgerýge ınvestısııa tartý bolyp tabylady. Geologııalyq aqparattyń biryńǵaı derekter bankin ónerkásiptik paıdalanýǵa berýdi aıaqtaý qajet», dedi Álıhan Smaıylov.
Indýstrııa jáne ınfraqurylymdyq damý mınıstri Qaıyrbek О́skenbaev jer qoınaýynyń jaı-kúıine monıtorıng jáne paıdaly qazbalardy óndirýge memlekettik baqylaý kúsheıtiletinin, qajetti salalyq sheshimder qabyldaý jáne bıznes-prosesterdi sıfrlandyrý prosesi jedeldetiletinin atap ótti.
Sonymen qatar, Premer-Mınıstrdiń aıtýynsha, osy aıda mınıstrlikterdiń josparlanǵan alqa májilisterinde barlyq salalyq tujyrymdamalar men damý josparlary qaralady.
Keńesti qorytyndylaı kele, Premer-Mınıstr Úkimet aldynda ekonomıkanyń naqty mánde 4%-ǵa ósýin qamtamasyz etý, ınflıasııany 2 esege 9,5%-ǵa deıin tómendetý jáne 2023 jyly $24,4 mlrd kóleminde tikeleı sheteldik ınvestısııalar tartý sekildi mańyzdy mindetter turǵanyn atap ótti.
«Bizdiń basty maqsatymyz – eldiń áleýmettik-ekonomıkalyq damýynyń ósýin qamtamasyz etý, halyqtyń turmys sapasy men ál-aýqatyn odan ári arttyrý. Sizderden tıimdi jumys jáne sheshim qabyldaýda úlken jaýapkershilik talap etiledi», dep túıindedi Álıhan Smaıylov.
