Turǵyndar aýyzsýdyń sapasyz ekenin aıtqan. Aýdan ákimi Aıtýǵan Shaıhımov hatta jazyp kórsetkendeı, Zaharovkadaǵy sý qubyrynyń uzyndyǵy – 3,5 km. Ony qaıta qurý jumystary 2008 jyly júrgizilipti. Al 2021 jyly sýmen jabdyqtaý nysandaryna 14,1 mln teńge qarajat bólinip, oǵan sý munarasy jańartylyp, qosymsha sý kolonkalary ornatylǵan. Sondaı-aq sý jelisiniń tıimdiligin arttyrýǵa mán berilgen. Odan aǵyp keletin tirshilik náriniń dámi mezgil saıyn tuz tatyp, ashy bolyp ketetinin eskergen jergilikti bılik endi keler jyly keshendi blok-modýl ornatyp berýdi uıǵaryp otyr.
– Zaharovkadaǵy tútin sany – 78, jalpy 212 adam turady. Bıyl 54,7 mln teńgege aýyl ishindegi 1,6 shaqyrym jolǵa asfalt tóseldi. «Indýstrııa svıazı» JShS turǵyndar turaqty ınternet baılanysyna qol jetkizýi úshin dińgekti baılanys ornatty. Nátıjesinde «ýatsap» jelisi arqyly baılanysqa shyǵý múmkindigi bar. Buıyrtsa, 2025 jylǵa deıin munda uıaly baılanysty qamtamasyz etetin antennaly qurylǵy qoıylady. Al Zaharov negizgi mektebinde bıyl shatyry jóndelip, kireberis esigi jańartyldy, – dep jaýap berdi Aıtýǵan Abylaıuly.
Aýdan basshylyǵynyń máselege jedel ún qatyp, joba-josparlarymen bólisip jatqany quptarlyq qadam. Aýyl jurtyn alańdatqan túıtkilderdiń túıini tarqap, zamanǵa saı ınfraqurylym ornap jatsa, bul da bir úlken ıgilik bolar edi. Keler jyly aýyldyq aýmaqtardy damytýǵa memleket tarapynan kóp kóńil bólinip otyrǵany da málim. Endeshe alda jaqsylyq kútemiz.
Pavlodar oblysy,
Jelezın aýdany,
Zaharovka aýyly
