Monopolıst kompanııa turǵyndardyń elektr jaryǵy boıynsha shyǵynyn jabýǵa 240 mln teńge bólgen. Bul qarajat tutynýshylar arasynda teńdeı bólinip, esepshottaryna jaqyn ýaqytta aýdarylady. «OAEK» AQ basqarma tóraǵasy Baǵdat Oral ótemaqynyń keshiktirilýine elektr energııasy qyzmetin kórsetetin kompanııanyń bólek kásiporyn ekeni sebep bolǵanyn jetkizdi. Olarmen kelisimge kelip, barlyq shyǵyndardy esepteý úshin biraz ýaqyt jumsalǵan. Sońynda ótemaqyny 48 myń tutynýshy alýy kerek degen sheshimge kelipti. Bul – qalanyń barlyq otbasylary eskeriledi degen sóz.
– Algortımdi túzý úshin biraz ýaqyt qajet boldy. Qala jurty qalypty jaǵdaıda bir aı ishinde 220 mln teńgeniń elektr jaryǵyn tutynady eken. Osy málimetterdi qoryta kelip, biz «Ekibastuzenergo» kompanııasyna 240 mln teńge aýdaramyz dep sheshim qabyldadyq. Bul jýyq arada barlyq tutynýshynyń abonenttik shottaryna taratylady. О́temaqyny tóleý kezinde apat oryn alǵan kúnderdi emes, tutas bir aılyq esepti eskerdik, – dedi ol.
Sondaı-aq basqarma tóraǵasy tótenshe jaǵdaı kezinde páterdegi tómen temperatýranyń kesirinen isten shyqqan turmystyq tehnıkalar úshin de ótemaqy tólenetinin jetkizdi. Barlyq kelip túsken ótinish qaralyp, apattyń shyn máninde tehnıkalarǵa zııany tıgeni dáleldense, buıymdardyń quny óteledi. Eger azamattar tehnıkany óz qarajaty esebinen jóndetip qoısa, chekterin saqtaýy kerek. Jumys istemeı qalǵan elektr quraldaryn arnaıy mamandar tekserip, qorytyndy shyǵarady. Búginge deıin keıbir turǵyndar burynnan istemeı turǵan turmystyq tehnıkalaryn apatta buzyldy degen jeleýmen ótemaqy talap etpekshi bolǵan. Sondyqtan arnaıy komıssııa barlyǵyn tekserip ótpek.
Ekibastuz qalasynyń ákimi Aıan Beısekın qazirgi ýaqytta shahar boıynsha 30 kópqabatty úıde jylý normalary talapqa saı bolmaı otyrǵanyn aıtady. Bul máseleni jylý-energo ortalyǵynda qosymsha taǵy eki qazandyqty iske qosý arqyly sheshý kózdelýde.
– Barlyq kópqabatty baspanalar jylýmen tolyq qamtylǵan. Deı turǵanmen 30 mekenjaıda temperatýralyq jáne gıdravlıkalyq parametrler boıynsha máseleler týyndap tur. Buǵan negizgi sebeptiń biri – jylý berý stansasyndaǵy keıbir qazandyq agregattarynda problemalar jıi oryn alady. Keıbiri isten shyqsa, endi biri qatarǵa qaıta qosylyp jatyr. Sonyń saldarynan jylý júıesinde teńgerimsizdikter týyndaıdy. Stansa jumysyn turaqtandyrý mindetimen mamandar shuǵyldanyp jatyr, – dep baıandady ákim.
Tótenshe jaǵdaı kezinde 424 páter búlingen. Onyń 52-sinde jóndeý jumystary júrgizilýde. Jalpy sany 338 páterge aǵymdaǵy jóndeý qajet. Barlyq shyǵyndy «OAEK» kompanııasy kóteredi. 13 páter «Asar Ume» qoǵamdyq qorynyń esebinen bútindelýde.
Pavlodar oblysy,
Ekibastuz qalasy
