Alaqandaı aýyldaǵy aq túıeniń qarny jarylatyn ádemi oqıǵa. Artefaktilerdiń kómegimen sonaý tas dáýirinen jylǵa tartatyn jylnama oqýshylardyń sanasyna tarıh taǵylymyn sebezgileýde. Baıtaq bilimniń bastaý kózin ashqan №3 kópsalaly mektep-gımnazııasynyń tarıh pániniń muǵalimi Serik Ysqaqov. Ustazdyń aıtýyna qaraǵanda, baǵaly arheologııalyq jádigerlerdi oblystyq tarıhı-ólketaný jáne «Botaı» memlekettik tarıhı-mádenı qoryq mýzeıleriniń qyzmetkerleri tapsyrypty. Jas urpaqtyń qamyn oılaǵan janashyrlyq. Este joq eski kezeńniń qupııasymen tanysýǵa oqýshylar da qushtar. Osy bir umtylys tynymsyz ustazdyń qoltyǵyna qanat baılaǵan.
– Ázirge jádigerler asa kóp bolmaǵanymen meılinshe qyzyqty, – deıdi Serik Ysqaqov, – kóne dáýirge degen dál osyndaı qyzyǵýshylyq týyndaıdy dep oılaǵan da joq edim. Oqýshylar shyn máninde bilgisi kelip talpynady, neshe alýan suraqtar qoıady. Qola dáýirindegi qolónershiler jasaǵan zergerlik buıymdardy ustap kórip, ólkeniń qanshalyqty ónerli ári mádenıetti bolǵandyǵyn túısinýde. Qorǵandardy qazý kezinde tabylǵan qarý-jaraqtar da el qorǵaǵan erlerdiń bitim-bolmysyn aıǵaqtaıtyndaı.
Kabınette Býrabaı men Zerendi aýdandarynyń arheologııalyq kartasy ornalastyrylypty. Kelesi jyly mektep-gımnazııa oqýshylary osy qazbalarǵa baryp, zertteý jumystaryn júrgizbek. Ýystaryna Uly dalanyń ulaǵatyn uqtyratyn olja ilige qalsa, óńir tarıhyn eseleı túsetin úles bolmaq.
– Men bilim oshaǵymyzda tarıh jáne arheologııa kabınetiniń ashylǵanyna qýanyshtymyn. Jańa kabınettegi árbir jádiger biz úshin baǵa jetpes buıym, – deıdi arheologııa boıynsha qalalyq baıqaýdyń bas júldesin ıelengen 8-synyp oqýshysy Samat Táshmaǵambetov.
Jańadan ashylǵan kabınette Kókshetaý qalasynyń bilim bólimi «Qazaq halqynyń ult-azattyq kóterilisiniń tarıhy – han Kene» atty úshinshi qalalyq ǵylymı-tájirıbelik konferensııasyn ótkizdi. Pedagogter men oqýshylar forýmy, Kenesary hannyń 220 jyldyǵyna jáne bilim oshaǵynyń 30 jyldyǵyna arnalǵan mańyzdy sharalar uıymdastyryldy. Osylaısha, shaǵyn aýylda tylsym tarıh shamshyraǵy shýaǵyn tógip
tur.
Aqmola oblysy
