Pavlodar oblystyq kórkemsýret mýzeıi budan bylaı Halyq sýretshisi Naǵymbek Nurmuhammedovtiń esimimen atalady. Qýanyshty oqıǵaǵa oraı qylqalam sheberiniń sýretterinen kórme uıymdastyrylyp, túrli taqyryptaǵy kartınalar kópshilikke kózaıym boldy.
Naǵymbek Nurmuhammedov kóziniń tirisinde otandyq beıneleý óneri men kórkemsýret mádenıetin damytýǵa baǵa jetpes úles qosqan jan. Ol – Ekinshi dúnıejúzilik soǵystyń ardageri, Qazaq KSR Halyq sýretshisi, ónertaný ǵylymdarynyń kandıdaty, Sh.Ýálıhanov atyndaǵy Qazaq KSR Memlekettik syılyǵynyń laýreaty. Sýretshi 1924 jyly Baıanaýyl aýdanynyń Saıtandy degen jerinde dúnıege kelgen. Maıdan dalasynan aman-esen oralǵan soń 1947-1953 jyldary Lenıngradtaǵy Ilıa Repın atyndaǵy keskindeme, músin jáne sáýlet ınstıtýtynda professor R.R.Frenstiń jetekshiligimen bilim alǵan. 1959 jyly Almatyǵa kóship, О́ner akademııasyn támamdady. Negizinen realızm jáne ımpressıonızm baǵyttarynda izdenip, kóptegen portret pen peızajdy, tarıhı taqyryptaǵy kartınalardy salǵan.
О́ńirdegi Sýretshiler odaǵy qoǵamdyq birlestiginiń tóraǵasy О́serbaı Shuranov atap ótkendeı, sýretshiniń búkil shyǵarmashylyǵy úlken kenepterge túsirilgen keskindemelerdiń erkindigimen, túster úılesimdiligimen, taqyrypqa psıhologııalyq turǵydan boılaýymen, beınelerdiń lırıkasymen erekshelenedi.
– Nurmuhammedov qazaq dalasyndaǵy qarapaıym adamdardyń eńbegin beıneleýdi erekshe jaqsy kórdi. Abaı Qunanbaıuly, Ábilhan Qasteev, Saparǵalı Begalın, Toqash Bokın, Málik Ǵabdýllın, Talǵat Bıgeldınov sııaqty tanymal tulǵalardyń portretterin salǵan. Jeti jasynda ákesi qaıtys bolyp, Novosibir, keıin Almatyda jetimder úıinde tárbıelengen. Bilim alýyna Qazaq Ǵylym Akademııasynyń negizin salýshy Qanysh Sátbaev kóp kómek kórsetipti. Jazýshy Qalmuqan Isabaev esteliginde keltirgendeı, birde Qanysh aǵanyń kabınetinde otyrsa, bir jas jigit kirip kelip, sálemdesip ketedi. Álgi jigitti odan keıin de birneshe ret kóredi. Tegin emes ekenin bilgen qalamger «Bul bala kim?» dep Qanekeńneń suraıdy ǵoı. Qanysh aǵamyz: «Bul – Naǵymbek degen jas sýretshi. Ata-anasynyń qolynan dám tatqan edim. Qazir áke-sheshesi qaıtys boldy, eshkimi joq, sondyqtan qaraılasyp júrmin», dep aıtqan eken. Sol jas jigit keıin ónerimen dúıim odaqqa tanymal bolady. Osyndaı ataqty jerlesimizdiń esimi oblystyq kórkemsýret mýzeıine berilip otyrǵany bizdi aıryqsha qýantty, – deıdi О́.Shuranov.
Sýretshi kóziniń tirisinde otandyq óner tarıhyn zerttep, «Qazaqstan óneri», «Qazaqstan grafıkasy», «Qoja Ahmet Iаsaýı mavzoleıi», «Qazaqstan sýretshileri – Ekinshi dúnıejúzilik soǵysqa qatysýshylar» degen eńbekter jazdy. Fransııa, Brazılııa, Japonııa elderine shyǵarmashylyq saparmen baryp kórmeler uıymdastyrǵan, sýretter toptamasyn jasaǵan. Salǵan kartınalary Kanada, Belgııa, Iýgoslavııa, Fınlıandııa kórmelerinde qoıyldy. Qazaqstannyń beıneleý óneri jóninde kitaptar men albomdar shyǵardy. «Eńbek dańqy erleri» toptamasy QazKSR Memlekettik syılyǵyn alǵan.
Kórmede qylqalam sheberiniń 27 týyndysy usynyldy. Almatydan arnaıy kelgen Mara Naǵymbekqyzy kórkemsýret mýzeıine ákesiniń eki kartınasyn syıǵa tartty.
«Ákem týǵan topyraqqa birinshi ret aıaq basyp turmyn. Shaharda Naǵymbek Nurmuhammedovtiń shyǵarmashylyǵy beınelengen aıaldama baryn kórip, keremet tolqydym. Jerlesteri sýretshiniń eńbegin umytpaı, jas urpaqqa onyń baı sýret galereıasynan aqparat usynyp, tanytýy óńirdegi mádenıet salasy basshylyǵynyń durys baǵytta jumys istep otyrǵanyn kórsetse kerek. Mýzeıge esimi beriletinin estigende aıryqsha qýandym. Jergilikti mádenıet mekemelerine alǵysym sheksiz. Ákem eńbeksúıgish jan edi. Adamdarmen aralasqanda aqıqatty aıtqandy unatatyn», deıdi qylqalam sheberiniń qyzy Mara Naǵymbekqyzy.
PAVLODAR
