Jıyn barysynda óńir ákimi Marat Sultanǵazıev, Aýyl sharýashylyǵy mınıstri Erbol Qarashókeev, Indýstrııa jáne ınfraqurylymdyq damý mınıstri Marat Qarabaev, sondaı-aq Ulttyq ekonomıka vıse-mınıstri Baýyrjan Omarbekov jáne Energetıka vıse-mınıstri Jandos Nurmaǵanbetov baıandama jasady. Olar oblystyń damý qarqyny, aýyl sharýashylyǵy jáne ónerkásip salalaryndaǵy aǵymdaǵy ahýal, avtomobıl joldaryn salý, turǵyn úı jáne turǵyn úı-kommýnaldyq ınfraqurylymdy jańǵyrtý josparlary jaıynda aıtyp berdi.
Baıandamashylardy tyńdaǵan Premer-mınıstr Úkimet Memleket basshysynyń saılaýaldy baǵdarlamasynda usynylǵan keń aýqymdy reformalardy iske asyrýǵa kiriskenin atap ótti.
«Onda damýdyń negizgi draıverleri retinde óńirlerge erekshe kóńil bólinip otyr. Prezıdent tapsyrmasyna sáıkes, aldaǵy jyldarda aýyldyq aımaqtardy órkendetýge basymdyq berilip, aýyl sharýashylyǵy ekonomıkanyń jańa qozǵaýshy kúshine aınalatyn bolady. Bul rette elimizdiń agrarlyq-ındýstrıaldy óńiri bolyp sanalatyn Almaty oblysynyń alatyn orny erekshe», dedi Álıhan Smaıylov.
Onyń aıtýynsha, jýyrda Aýyldyq aýmaqtardy damytýdyń 5 jylǵa arnalǵan tujyrymdamasy qabyldanady. Ol aýyl ekonomıkasyn, jer qatynastaryn, jergilikti ózin-ózi basqarýdy jáne basqa da salalardy jańǵyrtýǵa baǵyttalady. Sonymen qatar Halyqtyń tabysyn arttyrý baǵdarlamasy aıasyndaǵy jumystar, sondaı-aq bos jatqan jerlerdi memleket menshigine qaıtarý, aýyl sharýashylyǵy kooperasııasyn damytý jáne sýarmaly jerlerdi kóbeıtý boıynsha jumystar jalǵasady.
Premer-mınıstr áleýmettik ınfraqurylymdy damytý boıynsha da aýqymdy mindetter turǵanyn atap ótti. Bul baǵytta «Jaıly mektep» jáne «Aýyldyq densaýlyq saqtaýdy jańǵyrtý» jańa ulttyq jobalary iske asyryla bastady. Atap aıtqanda, úsh jyl ishinde oblysta 68 myń orynǵa arnalǵan 63 mektep jáne 38 jańa medısınalyq-sanıtarııalyq alǵashqy kómek nysanyn ashý josparlanǵan.
«Úsh aýysymdy oqytý máselesin sheshý úshin qosymsha 9 mektep salý qajet. Qarjy mınıstrliginde sybaılas jemqorlyqqa baılanysty bıýdjetten tys qorymyz bar. Oǵan 120 mlrd teńge tústi. Ákimdik Oqý-aǵartý mınıstrligine qarajat bólýge tıisti ótinim berý kerek», dedi Álıhan Smaıylov.
Ol 2030 jylǵa deıin Almaty aglomerasııasyn damytý, sondaı-aq Memleket basshysy qol qoıǵan jańa zań («Aglomerasııalardy damytý týraly») aıasynda Almaty oblysy men Almaty qalasynyń damýyndaǵy teńgerimsizdikti joıý boıynsha keshendi jumys júrgiziletinin atap kórsetti.
Álıhan Smaıylovtyń aıtýynsha, aglomerasııa aımaǵynda shıkizattyq emes sektordyń iri kásiporyndary shoǵyrlanǵan.
«Indýstrııalyq aımaqtardy qurý, sheteldik kompanııalardy relokasııalaý, ınvestısııalardy tartý boıynsha jumystardy jalǵastyrý mańyzdy, nátıjesinde bul ekonomıkany ártaraptandyrýǵa múmkindik beredi. Bul jumysty básekege qabiletti ónim shyǵarýǵa, onyń ishinde agroónerkásiptik keshen salasyna basa nazar aýdara otyryp, jandandyrý kerek», dedi ol.
Premer-mınıstr búginde oblystyń ınvestısııalyq portfeli quny 718 mlrd teńgeden astam somany quraıtyn 134 jobany qamtıtynyn atap ótti. Osy jobalar aıasynda 8 myńǵa jýyq jumys orny qurylatyn bolady. 2022 jyldyń qorytyndysy boıynsha jalpy quny 111 mlrd teńge bolatyn 39 joba iske asyryldy.
«Taǵy 95 joba iske asyrylýda. Onyń quny 600 mlrd teńgeden astam. Oblys ákimdigi barlyq jobalardy merziminde iske qosýy kerek», dedi Álıhan Smaıylov.
Kelesi máselege toqtalǵan Úkimet basshysy azyq-túlik taýarlarynyń baǵasyn turaqtandyrý úshin deldaldyq shemalardy anyqtaý boıynsha óńirlik komıssııalardyń tıimdi jumysyn qamtamasyz etý, zamanaýı kókónis qoımalaryn salý men jańǵyrtý, sondaı-aq basqa da retteý jáne baqylaý sharalaryn qoldaný qajet ekenin atap ótti.
«Bul jerde ishki naryqty ózimizdiń azyq-túliktermen toltyrý jáne olardy maýsymaralyq kezeńde saqtaý úshin jaǵdaı jasaý boıynsha júıeli jumys júrgizý mańyzdy», dedi ol.
Keńesti qorytyndylaı kele, Premer-mınıstr Qonaev qalasynda jáne Jápek batyr aýylynyń mańyndaǵy káriz-tazartý júıeleri jobalary boıynsha daıyndyq jumystaryn júrgizý, saıajaı aýmaqtaryndaǵy máselelerdi sheshý boıynsha jospar ázirleý jáne Qonaev qalasynda polıtehnıkalyq kolledj salý máselesin pysyqtaý, sondaı-aq óńirdiń ırrıgasııalyq júıelerin jáne sýarý jelilerin jańartý qajet ekenin atap ótti.
Oblys ákimdiginde Álıhan Smaıylov Qonaev qalasyn damytýdyń bas josparymen, G4 City-di odan ári ázirleý jobasymen jáne Talǵar aýdany Aqdala aýylynda turǵyn úı alaptaryn salý josparymen tanysty.
