Saltanatty is-sharaǵa «Qazaqstan máslıhattary depýtattarynyń birlestigi» RQB tóraǵasy Tóleýbek Muqashev pen belgili jýrnalıst Zeıin Álipbek qatysyp, kitaptyń qyzyl lentasyn birlese qıdy.
Atalmysh analıtıkalyq-usynymdyq zertteý eńbegi memleket tizginin ustaǵan barlyq deńgeıdegi basshylar men ıdeologtarǵa nusqaýlyq-qoıyn kitapsha retinde ázirlengen.
Qazaqstan tarıhynda osy taqyrypta alǵash ret qolǵa alynǵan kitap 5 taraý, 432 betten turady. Teorııalyq bazasy Ulybrıtanııa úkimetiniń keńesshisi, Eýropa parlamentiniń depýtaty, aǵylshyn ǵalymy Saımon Anholt konsepsııasyna negizdelgen.
«Qazaqstan máslıhattary depýtattarynyń birlestigi» RQB tóraǵasy Tóleýbek Muqashevtyń aıtýynsha, atalmysh eńbek el Úkimetine, aýmaqtyq atqarýshy organdarǵa zor paıdasyn tıgizedi.
«Bul - el ıdeologtary áli oıǵa da alyp úlgermegen tyń joba. Bul eńbek óz mazmunynda úsh «qabatty» qamtyǵan eken: birinshisi - brendtik-ımıdjdik, ekinshisi - ıdeologııalyq jáne úshinshisi – ulttyq qundylyqtar órisi. Tap mundaı basqarýshylyqqa arnalǵan jumystar bir ońtústik óńiri emes, elimizdiń ár aımaǵyna laıyqtalyp ázirlenýi tıis. Olardyń jalpy jıynynan eldik aýqymdaǵy ortaq ıdeologııa somdalyp shyǵady», dedi T.Muqashev.
Bul rette Zeıin Álipbek kitaptyń basshylyq, bılik pen qoǵam jáne BAQ araqatynasyna arnalǵan tustaryna toqtaldy.
«Kontentti beıimdeý jáne óńirlik-qalalyq BAQ-pen jumys isteýge kóp oryn berilipti. Bul aımaqtyq medıa naryqty damytýdyń jalpy álemdik úrdisi, ıaǵnı jergilikti halyqqa túıindi habarlamalardy neǵurlym tıimdi jetkizýge múmkindik beredi. Onda da jergilikti erekshelikti, halyqtyń qalaýyn, problemalar men múddeler, ózgelik dárejesin, óńirlik nemese baıtaqtyq mańyzy bar jańalyqtardy jarııa etýdiń jedeldigin eskerý qajet. Bul «bir» desek, ekinshi jaǵynan muny túsinip oqyǵan adam kemi bir oblys nemese qalanyń ıdeologııa jónindegi orynbasary dárejesine deıin ósetin tárizdi. Memlekettik qyzmette ómir baqı júrip jınaıtyn tájirıbe munda sheber sıpattalyp, op-ońaı jáne túsinikti tilmen jetkizilgen», dep atap ótti jýrnalıst.
Aıta ketsek, is-shara Ulttyq akademııalyq kitaphananyń jańadan jabdyqtalǵan Farıza Ońǵarsynova zalynda ótti.
Jıyn sońynda avtor prezentasııalanǵan kitap danalaryn qor bazasyna engizý úshin kitaphana dırektory Ǵazıza Qudaıbergenge tabystady.
