Burynǵy Mádenıet jáne sport mınıstri 2022 jyldyń naýryz aıynan beri qamaýda. Sybaılas jemqorlyqqa qarsy qyzmet oǵan bıýdjet qarajatyn jymqyrdy degen aıyp taǵyp otyr.
«2023 jyldyń 17 qańtarynda Astana qalasynyń mamandandyrylǵan aýdanaralyq tergeý soty kúdikti Muhamedıuly Arystanbekke qatysty qamaýǵa alý túrindegi sanksııalanǵan bultartpaý sharasynyń merzimin bir aıǵa uzartty», dep habarlady elordalyq sottyń baspasóz qyzmetinen.
Eske sala keteıik, 2022 jyldyń tamyzynda Sybaılas jemqorlyqqa qarsy qyzmet Mádenıet mınıstrliginiń burynǵy basshysy, Ulttyq mýzeıdiń dırektory Arystanbek Muhamedıulyna jáne basqa da tulǵalarǵa asa iri kólemde bıýdjet qarajatyn jymqyrý jáne quqyq buzýshylyq faktileri boıynsha tergeý bastalǵanyn habarlaǵan edi.
Tergeý «Altyn adamnyń álem murajaılary arqyly ótýi» halyqaralyq kórmesin ótkizýge, sondaı-aq «Qazaqstannyń ulttyq kıeli nysandaryn ulttyq fotogrammetrııalyq 3D skanerleý jáne murajaı» jáne «Qazaqstan Respýblıkasynyń ulttyq sıfrlyq fılmder jınaǵyn sıfrlandyrý» jobalaryna bólingen bıýdjet qarajatyn jymqyrý faktileri boıynsha júrgizildi.
Resmı derekterge qaraǵanda, tergelip jatqan qylmystyq ister boıynsha memleketke keltirilgen shyǵynnyń aldyn ala mólsheri jeti mıllıard teńgege jýyqtaǵan.
