Tıimdi dárigerlik tájirıbe almasý

Al Astana, Almaty sııaqty iri qala­lar­daǵy bilikti dárigerlerge qaral­ǵy­sy keletinder elimizdiń barlyq túk­pirinen tabylady. Osy oraıda Alma­tyd­aǵy Prezıdent Is basqarmasy medı­sınalyq ortalyǵy – Ortalyq klı­nıkalyq aýrýhanasynyń bir top dári­ger­i Aqtóbe qalasynda «Qazaqstan Respýblıkasy Prezıdenti Is basqarmasy me­dısınalyq ortalyǵynyń kúnderi» aıasynda tabysty jumys istegenin atap ótý­ge bolady.

Osylaısha, bilikti dárigerlerdiń eldegi densaýlyq saqtaý isine jańa zamanaýı ádisterdi engizý maqsatynda qolǵa alǵan bastamasy elimizdiń batys óńirinen bastaldy. Alǵashqy kúni OKA neırohırýrgııa bólimshesiniń meńgerýshisi Marat Sarshaev Aqtóbe medısınalyq ortalyǵynda operasııanyń jańa túri – mıkrovaskýlıarlyq dekompressııa jasap, úsh tarmaqty júıke nevralgııasy men gemıfasıaldy túıilýdi emdeýdiń ozyq tásilderin kórsetti.

– Bul biz úshin nátıjesinde pasıent ómirin aıtarlyqtaı jaqsartatyn ádettegi operasııa. Aqtóbelik áriptesterimiz osyndaı operasııalardy ózderi atqarýy úshin óz tájirıbemizben bólisýge daıynbyz. Men ótkizgen konsýltasııaǵa naý­qastar kóbinese omyrtqa jaryǵy, qan tamyry aýrýlary, mıdaǵy isik, epı­lepsııa máselelerimen keldi. Osy sapa­rymyzdaǵy aqparat almasý, keri baılanys kezinde bul óńirde epılepsııa aýrýyn emdeý edáýir damyǵanyn baıqadym. En­digi jerde jergilikti dárigerlermen ózara baılanysymyzdy burynǵydan da ny­ǵaıtyp, pasıentterge bilikti kómek bere alatyny­myzǵa senimdimin, sebebi bizde jaqsy tájirıbe bar, – dedi dáriger M.Sarshaev.

Almatydaǵy Ortalyq klınıkalyq aýrýhanasynyń onkohırýrgteri Es­taı Abzalbek pen Marat Ahetov te árqaısysy tórt saǵatqa sozylǵan kúr­deli operasııa jasady. Olar asqazandy qaıta­dan ish qýysyna qalpyna kelti­retin asqa­zan­dy jeńdik kesý men kó­ket jaryǵy operasııa­laryn jasady. Aqtóbelik pa­sıenttiń asqazany kóketti qysyp, den­saýlyǵyna úlken qıyndyq keltirgen. Eki operasııa da qosarly aýrýlarymen birge asqyný týdyrǵan, bir pasıentte dıabet, semizdik bolsa, ekinshisinde – burynǵy operasııadan qalǵan tyrtyqtyń saldary men jiti holesıstıt kedergi keltirgen. Alaıda laparoskopııalyq operasııa sátti ótti.

– Árıne, aqtóbelik áriptesterimiz bizge deıin de osyndaı operasııa jasap kelgen. Biraq olar bizdiń sheteldegi sheberlik sabaqtarynan suryptap aparǵan jańa kózqarasty, jańa ádisterdi kórdi. Onyń ústine biz mashyqtanǵan onkohırýrgter bolǵandyqtan, kúrdeli ope­rasııaǵa baıyppen qaraımyz, qaýip­terden, ózgeshelikterden qoryq­paımyz. Osy birigip jasaǵan tabysty operasııalarymyzdan keıin aqtóbelik áriptesterimizge alys shetelde oqý úshin qarjylandyrý qosýǵa ýáde berildi. Bul da nátıje. О́ıtkeni qazirgi tańda álemdik deńgeıdegi medısına maıtalmandarymen qarym-qatynas jasamasa bolmaıdy, onyń ústine medısına da jyldam damyp jatyr, ár jetistikti, ozyq tájirıbelerdi qalt jibermeýimiz qajet, – deıdi almatylyq mamandar.

Aldaǵy kúnderi Almatydan kelgen dárigerlerdiń basqa kúrdeli operasııa­lary, sheberlik sabaqtary, konsýltasııalary keńinen talqylanatyn bolady. Qazirdiń ózinde bul bastamany jergilikti áleýmettik jeliler belsendi túrde talqylady. Aqtóbe úshin Astana men Almaty dárigerleriniń kelýi  úlken oqıǵaǵa aınaldy. Budan ári Qazaqstan Respýblıkasy Prezıdenti Is basqarmasy medısınalyq ortalyǵynyń kúnderi Aqtóbe qalasyndaǵy tájirıbeni qaperge ala otyryp, basqa óńirlerde jalǵasyn tabady. Munda eń basty maqsat – halyq qaı óńirde tursa da, bilikti mamandardyń kómegine qol jetkize alýy kerek. О́ıtkeni «Qazaqstan Respýblıkasy Prezıdenti Is basqarmasy medısınalyq ortalyǵynyń kúnderi» aıasynda naýqas jandardyń kópshiligi Astana men Almatyǵa barýǵa múmkindigi joq alys aýyldarda turatyny aıan boldy.

ALMATY