Koronavırýs • 24 Qańtar, 2023

Tumaý báseńdedi

26 ret kórsetildi

Aqtóbe oblysynda qańtarda koronavırýs ınfeksııasyna shaldyqqan 24 naýqas tirkelse, keıingi aptada birde-bir koronavırýs belgisi bar adam tabylmaǵan. 17 qańtarda anyqtalǵan eń sońǵy naýqas – tumaý belgilerimen juqpaly aýrýlar aýrýhanasyna túsken júkti kelinshek. Aýrýhanada odan koronavırýsqa qarsy PTR-test alynǵanda, oń nátıje kórsetken.

Degenmen elimizdiń epıdemııa­lyq ahýal boıynsha «jasyl» aı­maq­ta turǵanyna qaramastan, ar­qa­ny keńge salýǵa bolmaıdy. О́ıt­keni koronavırýstyń álsiz shtam­darynyń tumaý jáne vırýsty ınfeksııaǵa qosylyp ketý jaǵ­daıyn da joqqa shyǵarmaıdy dári­ger­ler. Onyń ústine keıingi aıda álemde koronavırýstyń jańa shtamdary tirkelip jatyr. Sondyqtan koronavırýsqa qarsy vaksına alý jalǵasa beredi. Aldaǵy naýryz aıynyń sońyna deıin Aqtóbe oblysyna Pfizer ekpesi ákelinedi dep jos­parlanyp otyr. Bul týraly óńirlik kommýnıkasııalar qyzmetinde ótken brıfıngte baıandaldy.

Jeltoqsannan bastap óńirde adamnyń joǵarǵy tynys joldaryn zaqymdaıtyn jiti respıratorly vırýsty ınfeksııa jáne tumaý órship ketti. Oblystyq densaýlyq saqtaý basqarmasy basshysynyń orynbasary Bekbolat Izbasarovtyń habarlaýynsha, bıyl tumaýmen balalar kóp aýyrdy. Jáne bir ereksheligi – tumaý adamnyń aǵzasynan uzaq ýaqyt ketpeıtini baıqaldy.

«Bıyl qańtar aıynda Aqtóbe oblysynda tumaýǵa shaldyqqan 626 mektep oqýshysy, 938 júkti áıel tirkeldi. Keıingi eki aıda turǵyndar arasynda tumaýdyń A jáne R túri qatar tarady. Dárigerge júgingen naýqastardan polımeraldy tizbek reaksııasymen 2 675 úlgi zerttelgende, onyń 238-inen tumaý belgileri anyqtaldy. Tirkelgen naýqastardyń 85 paıyzy tumaýdyń rınovırýsty ınfeksııasyna, 15 paıyzy adenovırýsty túrine shaldyqqany anyqtaldy. Dene qyzýy joǵarylap, qatty jótel men tynys alýy qıyndaǵan 126 júkti áıel, bir jasqa deıin­gi 104 sábı juqpaly aýrýlar aýrýhanasyna jatqyzyldy. Keıin­gi aptada tumaý men jiti respıratorly vırýsty ınfeksııaǵa shaldyǵýshylar sanynyń báseńde­geni baıqalady. Qazirgi ýaqytta 65 turǵyn stasıonarlyq jaǵdaıda em qabyldap jatyr. Onyń 61-i Aqtóbe qalasynda, tórteýi aýdandyq aýrýhanalarda emdelýde. Oblystyq klınıkalyq juqpaly aýrýlar aýrý­hanasynda tumaýy asqynǵan bir jasqa deıingi 25 bala, 3 jas­qa deıingi 19 bala, 10 júkti áıel em qabyldap jatyr», deıdi B.Iz­basarov.

Oblystyq sanıtarııalyq-epıde­mıologııalyq baqylaý departa­mentiniń deregine qaraǵanda, Aqtóbe oblysynda keıingi segiz aı ishinde jiti respıratorly vırýsty ınfeksııa jáne tumaýmen 43 835 adam aýyryp, dárigerler kómegine jú­gingen. Sonyń ishinde 14 jasqa deıin­gi balalardyń arasynda 24 869, bir jasqa deıingi balalar arasynda 1 254 jaǵdaı tirkeldi. Qarasha, jel­toqsan, qańtar aıynda 208 mektep oqýshysy JRVI jáne tumaýmen aýyryp shyqqan. Qystyń sońǵy aıy da taıaý qalǵa­nyna qaramastan, sanıtarlyq-epıdemologııalyq qyz­met mamandary turǵyndardyń saqtyq sharalardan bas tartpaýyn suraıdy. Juqpaly aýrýǵa shaldyqpaý úshin qoǵamdyq oryndarda maska taǵyp, belsendi dene jattyǵýlaryn jasap, ashyq aýada serýendeý kerek, úı-jaılardy únemi jeldetip turý qajet dep keńes beredi. Qys kezinde adam aǵzasynda dárýmender jetispeýshiligi baıqalatyndyqtan, durys tamaqtanýǵa mán berý kerek.

Bul rette qazan aıynan bas­tap Aqtóbe oblysynda aldyn ala tumaýǵa qarsy 170 myńnan asa turǵyn ekpe alǵanyn aıta ket­ken jón. Qazirgi ýaqytta turǵyndar ara­synda tumaý men jiti respırator­­ly vırýsty ınfek­sııaǵa shal­dyq­qandar sany aıtarlyqtaı tómendedi.

 

Aqtóbe oblysy 

Sońǵy jańalyqtar

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar