Qazandyq ınvestordyń qamqorlyǵyna ótti

Esterińizde bolsa, oblys ákimi Danıal Ahmetov jóndeý ju­mystary úsh kún ishinde aıaq­talady degen. Demek 23 qańtar qaıta qalpyna keltirilip, kómir qazandyqqa óz jolymen túsýi kerek edi. Alaıda jumys jos­pardaǵydaı emes, keshikti.

– Kómir berý traktisinde jumys toqtaýsyz júrgizilip jatyr. Jumysshylar kún-túnge, sýyqqa qaramaı jumys istep júr. Mehanıkalyq jáne elektr jaǵy az ýaqyt ishinde jóndeldi. Aıta keteıin degenim, kompanııa 19 qańtar kúni 600 metr lenta tapsyrys berdi. Biraq jetkizýshiniń jaýapsyzdyǵynan laıyqty lenta kelmedi. Sodan biz basqa lenta izdeýge kiristik. Onyń bári ýaqyt. Iá, 22 qańtar kúni jumysty aıaqtap qoıýymyz kerek edi, – dep túsindirdi oblys ákiminiń orynbasary Erjan Nurbaev.

Jóndeý jumystaryn jedeldetý úshin 22 adamnan tura­tyn brıgadalar bir-birin almastyryp, naqty kestege saı árkim óz ýchaskesi men jumy­sy­na jaýap beredi. Jumysqa jy­lý stansalarynyń, qury­lys fırmalarynyń jáne «Kazsınk» kompanııasynyń eń­bek­kerleri tartylǵan.

Aıta ketsek, órt bolǵan kúni qazandyq mazýtqa kóshirilgen. Keıin júıedegi temperatýrany kóterý úshin sheshimin taýyp, qazandyqtarǵa kómirdi kranmen kóterip salyp otyr.

Bilikti mamandar jumylyp júrip, kómir berý traktisin qalpyna keltiredi. Bul ýaqyt ishinde turǵyn úılerdegi, meke­melerdegi qalypty temperatýra másele etip kóteretindeı tómendegen joq. Alaıda búgin lekerlep qoıǵan qazandyqtyń temiri erteń qaıta isten shyqpaı ma? Oblys basshysy Danıal Ahmetov qazandyqty birjola qalypty jumysqa keltirý úshin kommýnaldyq menshikke ótýi kerek ekenin aıtqan. Resmı aqpa­ratqa sensek, qaýsap turǵan qa­zandyqty jańa ınvestor qam­qorlyǵyna almaqshy eken. Jańa ınvestor Rıdder jylý energııa ortalyǵyn jańǵyrtýdyń naqty jospary bar ekenin aıtypty. Demek qazandyqtyń jaǵdaıymen jiti tanysqan. Komandany JEO ju­mysymen jaqsy tanys, tá­jirıbeli maman Quralbek Áb­dirahmanov basqarady eken. Al qazandyqty qashan, qanshaǵa satyp alady, bizge belgisiz. Biraq jańa ınvestor jumysqa kirisip ketken.

Oblys ákiminiń orynbasary Erjan Nurbaev atap ótkendeı, ınvestor Rıdderde qortqy kómir óndiretin zaýyt salýdy da jos­parlap otyr. Ony óndirý kezinde qazandyq agregattaryn jaǵý úshin qoldanylatyn gaz da bólinedi. Sondaı-aq kómir óndirisinde sýdy 95 gradýsqa deıin qyz­dyrady. Ony jylý jelisinde qoldanýǵa bolady. Jańa menshik ıeleri «Kazsınk» kásipornymen de iskerlik, áriptestik qarym-qatynas ornatýǵa nıetti. Olar metallýrgııalyq JShS úshin qortqy kómir óndirýge daıyn. Artylǵany QHR-ǵa eksport­talmaq. Qortqy kómir shyǵaratyn zaýyt qurylysynyń taǵy bir artyqshylyǵy ekologııalyq ja­ǵynan tıimdi. О́ıtkeni qortqy kómir óndirisinde kúl shyqpaıdy eken.

Aıta keteıik, ınvestorlyq kompanııa barlyq qajetti tó­lemderdi júrgizip, kerekti jab­dyqtardy satyp alyp, istelgen jumystardyń aqysyn tóleı bas­tady. Aldaǵy jylytý maýsymyn shtattyq rejimde ótkizýdi josparlap qoıǵan. Al jazda Rıdder JEO-ǵa tolyq jańǵyrtý júrgizilip, zaýyt qurylysy bas­talady.

Investor jańartylǵan kom­mýnaldyq kásiporynǵa ju­mysshy tapshylyǵy týyndamaýy úshin turǵyn úı satyp alýǵa daıyn ekenin de atap ótken. Esterińizge sala keteıik, qazandyqtyń aldyńǵy ıeleri jumys kúshinen aıyrylyp qalǵan. 2022 jyldyń qarashasyndaǵy apat kezinde qajetti 270 qyzmetkerdiń ornyna JEO-da nebári 100 shaqty adam jumys istegen.

Búgingi tańda kómir berý trak­tin jóndeý jumystary jal­ǵasyp jatyr. Kómir berý jolyn jelimdeý jumystary aıaq­taldy. Endigi kezekte iske qosý, retteý úderisi bastalady.

Shyǵys Qazaqstan oblysy,

Rıdder qalasy