О́leń murasynyń ózegi – atameken

Aqynnyń «Tań samaly» jınaǵyna engen óleńderiniń basym bóligi týǵan jerdiń tabıǵat syrlary men tamashalaryna arnalǵan. Máselen, «Jazǵy sýret» degen óleńin oqıyq.

«Keremet edi dala kórki qandaı,

Aq munar bıik shyńǵa asylady.

Búıirin túrtip qalsań

sel shyǵardaı,

Shoqyǵa bulttar

kelip qasynady...»,

deıdi aqyn. Tabıǵattyń tamasha kórinisteri: kósilgen kerbez dala, bıik shyń, qyr-qyrat, taý-tasqa «jelini» syzdaǵan bulttyń «qasynýy», bári-bári aqynnyń sezimin qytyqtap, shabytyn oıatyp, tógilte jyr arnatqan.

«Jasyrynyp kók belge,

Shalqalap baryp kún batty.

Sal jigit – samal ókpende,

Sybyrlap qaıyń dir qaqty.

Syńǵyrlap kúlki – bal bulaq,

Syrlasty ǵashyq – japyraq.

Dala – qart qalǵyp, qaljyrap,

Túńligin japty úı – atyrap.

Shekesinde taraq-aı,

Tómenge shyń-quz suqtandy.

Eljirep aspan anadaı,

Jalt etip juldyz – sút tamdy...». Bul aqynnyń «Túngi sýret» atty óleńi. Túnniń ózin jarqyraǵan kúndizdeı etip kórseter aqynnyń sheberligine qalaı tánti bolmaısyń?.. Qarańyzshy, kók belden asyp kún ketti, tún bastaldy. Aınalany qarańǵylyq japty. Sonda da, tún kómkergen álemdi aınytpaı kóre alǵan aqynnyń sezimi, júrek kózi qyraǵy. Túngi samaldy sal jigitke, bal bulaq únin syńǵyrlaǵan kúlkige, dalany qalǵyǵan qartqa, aıdy álemniń «shekesine» qystyrǵan taraqqa, aspandy eljiregen anaǵa, aqqan juldyzdy tamǵan bir tamshy sútke teńeı otyryp, qoıý túnniń qushaǵyndaǵy bar syrdy aldyńa ja­ıyp salady.

Tabıǵat lırıkasy – máńgilik taqy­ryp. Buǵan qalam tartpaǵan aqyn kemde-kem. Halyq aýyz ádebıe­tinen bastaý alatyn bul baǵytqa A.Manabaevtyń qosqan úlesin moıyndaı bilýimiz kerek. Sol úshin de ádebıet zertteýshileri aqynnyń tabıǵat ǵajaıyptaryn sezine otyryp jazǵan óleńderine kóńil aýda­ryp, taldap-tarazylap, ózindik baǵasyn berse, durys bolar edi.

«Mańaı jym-jyrt,

Maýjyraǵan tynysh tún.

Betti sýyq tikenimen urdy yzǵar.

Jarqyl qaǵyp

untaǵyndaı kúmistiń,

Jaǵama kep qonyp jatyr

juldyz-qar.

Taldyń sıda butaqtary ıile,

Saýsaǵymen aq ushqyndy shashýda.

Aınala appaq,

Kirsiz ǵajap dúnıe.

Qııa almaımyn aıaǵymmen basýǵa...». Bul – «Alǵashqy qar». Bári de túsinikti... О́leń avtorynyń aqyndyq qýatyn jazbaı tanısyń. Osyndaı óleńderdi jan-júregi taza, peıili keń, talantymen tabıǵattyń ózegine bar bolmysymen kirip, mynaý ǵajap dúnıemen tutasyp ketken, kóńiliniń terezesin esh ýaqytta kirletpegen daryn ǵana jaza alady.

«О́mir boıy bilegińdi túrinip,

Ystyqqa da,sýyqqa da shynyǵyp.

Mańdaıyńnyń terin ǵana simirip,

Basqalarǵa jumsamasań judyryq.

Munyń aty – Irilik», dep jyrlap ótken Aqylbek Manabaevtyń týǵan jer, Otan, jastyq shaq, mahabbat, ulttyq qundylyqtar, urpaq tár­bıesi taqyryptaryndaǵy jyrlary da jutynyp tur.

Shyǵys Túrkistandaǵy Qaraúńgir degen aýylda 1934 jyly dúnıege kelip, 1984 jyly Semeıde ómirden ozǵan aqynnyń sońynda qalǵan jyr jınaqtary tasada qalmasa, oqyr­mannyń qolyna qıyndyqsyz tıse degen tilek-usynysymyz bar. О́ıtkeni aqynnyń sózi – tárbıe kózi, halyqtyń úni.