Máýlen Áshimbaev jańadan saılanǵan jáne taǵaıyndalǵan áriptesterin quttyqtap, aldaǵy jumystyń basym baǵyttaryna toqtalyp ótti.
«Memleket basshysy Senattyń aldynda turǵan basty mindetterdi belgilep berdi. Aldymyzda atqaratyn jumys az emes. Bul rette elimizde júrgizilip jatqan reformalardy zańnamalyq turǵydan ýaqtyly qamtamasyz etý asa mańyzdy», dep M.Áshimbaev depýtattardyń jumysyna sáttilik tiledi.
Otyrys barysynda senatorlar belgilengen tártippen halyqqa ant berdi. Senat spıkeriniń usynýymen depýtattardyń daýys berýi nátıjesinde senator Jaqyp Asanov Palata tóraǵasynyń orynbasary bolyp saılandy. Sonymen qatar Senat reglamentine sáıkes turaqty komıtetterdiń tóraǵalary men músheleri, sondaı-aq olardyń sany men ataýlary bekitildi.
Depýtattardyń daýys berý nátıjesi boıynsha Andreı Lýkın Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy bolyp saılandy. Budan bólek, Sultanbek Mákejanov – Qarjy jáne bıýdjet komıtetiniń tóraǵasy, Asqar Shákirov – Halyqaralyq qatynastar, qorǵanys jáne qaýipsizdik komıtetiniń tóraǵasy, Súıindik Aldashev – Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy, Nurtóre Júsip – Áleýmettik-mádenı damý jáne ǵylym komıtetiniń tóraǵasy, Álı Bektaev – Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy retinde bekitildi.
Osy kúni M.Áshimbaevtyń tóraǵalyǵymen Palatanyń jalpy otyrysy ótti. Onda depýtattar birqatar zań jobasyn qarap, maquldady. Jıyndy ashqan Senat tóraǵasy Májilis merziminen buryn taratylyp, ol ýaqytsha bolmaǵan kezeńde Parlamenttiń zańdar men konstıtýsııalyq zańdardy qabyldaý qyzmeti tolyǵymen Senatqa júkteletinin aıtty.
«Májilistiń jańa quramy saılanǵanǵa deıin, zań shyǵarý úderisi toqtamaýǵa tıis. Memleket basshysynyń tapsyrmasymen ázirlengen jáne asa mańyzdy máselelerdi sheshýge arnalǵan zań jobalary ýaqtyly qaralyp, qabyldanýy qajet», dedi M.Áshimbaev.
Palata otyrysynda senatorlar «2014 jylǵy 23 jeltoqsandaǵy Eýrazııalyq ekonomıkalyq odaq sheńberinde medısınalyq buıymdar (medısınalyq maqsattaǵy buıymdar men medısınalyq tehnıka) aınalysynyń biryńǵaı qaǵıdattary men qaǵıdalary týraly kelisimge ózgeris engizý týraly hattamany ratıfıkasııalaý týraly» (10.06.2022 j. qol qoıylǵan) jáne «2014 jylǵy 23 jeltoqsandaǵy Eýrazııalyq ekonomıkalyq odaq sheńberinde medısınalyq buıymdar (medısınalyq maqsattaǵy buıymdar men medısınalyq tehnıka) aınalysynyń biryńǵaı qaǵıdattary men qaǵıdalary týraly kelisimge ózgeris engizý týraly hattamany ratıfıkasııalaý týraly» (30.12.2021 j. qol qoıylǵan) zańdardy qarap, maquldady.
«Kelisim 2016 jylǵy 12 aqpanda kúshine engen. Búgingi tańda Eýrazııalyq ekonomıkalyq komıssııa keńesi odaq sheńberinde medısınalyq buıymdar aınalysynyń biryńǵaı qaǵıdattary men qaǵıdalary týraly kelisimge ózgeris engizý týraly tórt hattamany maquldady. Búgin depýtattar qaraýyna sonyń birinshi jáne ekinshi hattamasy usynylyp otyr. Qalǵan eki hattama memleketishilik kelisý jáne qol qoıý kezeńinde.
Qaralyp otyrǵan birinshi hattamany ratıfıkasııalaý burynǵy ulttyq rásim boıynsha berilgen merzimsiz tirkeý kýálikteri bar medısınalyq uıymdarǵa Eýrazııalyq ekonomıkalyq odaq sheńberinde qaıta tirkelmeı Qazaqstan aýmaǵynda erkin aınalymda bolýyna múmkindik beredi. Ulttyq zańnama boıynsha 10 medısınalyq buıym tirkelgen. Olardy odaq sheńberinde qaıta tirkeýdiń qajeti joq», dedi zań jobasy jóninde baıandama jasaǵan Densaýlyq saqtaý mınıstri Ajar Ǵınııat.
Sala basshysynyń aıtýynsha, ekinshi hattama ulttyq tirkeýdi 2022 jyldyń aıaǵyna deıin uzartýǵa jáne ulttyq zańnama boıynsha jańa medısınalyq buıymdardy tirkeýge múmkindik bergen. Alaıda buǵan tıisti mekemeler daıyn bolmaǵandyqtan, ony 2025 jylǵy 31 jeltoqsanǵa deıin sozý týraly tórtinshi hattama ázirlenip jatyr.
«Bul zańdar Eýrazııalyq ekonomıkalyq odaq aıasyndaǵy medısınalyq buıymdar aınalymyna qatysty jekelegen máselelerdi retteýge arnalǵan. Jańa normalar Eýrazııalyq ekonomıkalyq odaqqa múshe memleketterdi sapaly medısınalyq buıymdarmen júıeli negizde qamtamasyz etýge qolaıly jaǵdaı qalyptastyrady dep senemiz», dedi Máýlen Áshimbaev.
Sonymen qatar senatorlar jańa redaksııadaǵy «Qazaqstan Respýblıkasyndaǵy sıfrlyq aktıvter týraly» zańdy jáne oǵan ilespe «Qazaqstan Respýblıkasynyń keıbir zańnamalyq aktilerine sıfrlyq aktıvter, aqparattandyrý jáne sottyq ákimshilendirý máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly», «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin (Salyq kodeksi) qoldanysqa engizý týraly» Qazaqstan Respýblıkasynyń zańyna ózgerister men tolyqtyrýlar engizý týraly» zańdardy qarap, maquldady.
Atalǵan zańdar elimizde sıfrlyq aktıvter men sıfrlyq maınıngti shyǵarý jáne olardyń aınalymy jónindegi qyzmetti odan ári damytý úshin quqyqtyq baza qalyptastyrýdy kózdeıdi. Aıta keteıik, ótken aptada senatorlar bul zańdardy konseptýaldy túrde maquldap, olardyń jekelegen baptaryna ózgerister engizý jónindegi usynystarymen Májiliske qaıtarǵan edi.
