Elde 16 myń adam alıment tólemeı júr

Balany asyraý máselesin beıbit jolmen sheshý kez kelgen erli-zaıyptylardyń qolynan kelmeıdi. Bul jaǵdaıda daý sotta sheshiledi. Ádilet mınıstrliginiń málimetinshe, qazir Qazaqstanda balalaryna 14 mıllıard teńgege jýyq qaryzy bar 80 myńnan astam adam bar. Sot oryndaýshylarynda 305 myńǵa jýyq atqarýshylyq qujat óndiriste jatyr. О́ńirler turǵysynan alǵanda boryshkerlerdiń eń kóp sany Astana men Almaty qalalarynda tirkelgen.

Zańgerlerdiń aıtýynsha, tólem kólemin azaıtý úshin naqty tabysyn ádeıi tómendetetin jaǵdaılar da kóp.

«Kóbinese másele sot oryndaýshylarynyń alımentpen aınalysqysy kelmeıtindiginde, óıtkeni alıment týraly atqarýshylyq is júrgizý memleketten tólenedi, bul óte az soma», deıdi advokat Ilıa Lýnev.

Zań tipti jumyssyzdardy alıment tóleýge mindetteıdi. Sonymen qatar, boryshkerdiń ústinen qylmystyq is qozǵaý úshin 3 aı ǵana aqsha aýdarmaý jetkilikti. Eń jaqsy jaǵdaıda qoǵamdyq jumystarǵa tartylýy múmkin, eń jamany - 2 jylǵa deıin bas bostandyǵynan aıyrý. 2022 jyly sottar júzden asa qazaqstandyqty qylmystyq jaýapkershilikke tartqan.

«Máselen, eger boryshker bir jyl buryn aıyna 500 myń teńge tabys tapsa, al kirister týraly anyqtamada ol 70 myń teńge alatynyn kórsetse, onda sot oryndaýshysy bul faktini tekserýge bastamashy bola alady. Biz shottardy tekseremiz, shyǵyndardy qarastyramyz. Eger alıment tóleýshi turǵyn úıdi jaldaý aqysyn tólese, nesıesin ótese, kúnine 10-20 myń teńge jumsasa, onda ol óziniń naqty tabysyn jasyrady degen kúdikke ilinedi. Mundaı jaǵdaılarda biz aqparat jınap, ishki ister organdaryna usynys jiberemiz. Jetkilikti aqparat bolǵan jaǵdaıda oǵan qylmystyq is qozǵalýy múmkin», dep túsindirdi Astana qalasy boıynsha jeke sot oryndaýshylarynyń óńirlik palatasy basshysynyń orynbasary Salamat Ádilbekuly.

Gúlshahra SANSYZBAI