Telefon arqyly saýalnamany Ortalyq saılaý komıssııasynyń resmı ruqsatymen Qoǵamdyq pikirdi zertteý ınstıtýty júrgizdi.
«Kezekten tys parlamenttik saılaýda daýys berýge nıet bildirgenderdiń 48,6 paıyzy «AMANAT» partııasynyń kandıdattaryn qoldaýǵa bel býǵan. Saýalnama málimetterine sáıkes, búginde «Aýyl» (6,2%) jáne «Aqjol» (5,4%) partııalary 5 paıyzdyq mejeni eńserip otyr. Basqa partııalar áli elektorattyń qoldaýyn ala alǵan joq: QUP (4,8%), Respýblıka (3,6%), OSDP (3,2%), Baıtaq (2,8%). «Barlyǵyna qarsy» daýys berýge daıyn respondentterdiń úlesi 2,6%-dy qurady. Respondentterdiń 1/5-ten astamy (22,8%) partııalyq tańdaýyn áli sheshken joq», delingen ǵylymı-zertteý ınstıtýtynyń habarlamasynda.
Bir qyzyǵy, saılaýshylardyń basym bóligi saıası plıýralızmdi jaqtaıdy, ıaǵnı 27,8% tómengi palatada bes jáne odan da kóp partııany qoldasa, 6,6% tórt, 16,8% úsh, 12% eki partııany jaqtaıdy.
Eske salaıyq, sosıologııalyq zertteý bıylǵy jyldyń 25-28 qańtary aralyǵynda ınstıtýttyń jeke qarajaty esebinen júrgizildi. Iriktemege 17 oblys pen respýblıkalyq mańyzy bar qalalardan Astana, Almaty jáne Shymkent qalalarynan 18 jastan asqan 1200 respondent qatysty.
