Medısına • 30 Qańtar, 2023

Sábıge jasalǵan kúrdeli operasııa

Shymkent qalalyq balalar klınıkalyq aýrýhanasynyń taratqan málimetine sáıkes qańtar aıynyń basynda atalǵan klınıkaǵa tórt aılyq sábı jedel járdemmen jetkizilgen. Aýrýhanaǵa shuǵyl ákelýge sábıdiń toqtaýsyz jótelýi, entigýi men boıyndaǵy jalpy álsizdik belgileri sebep bolǵan. Dárigerler shaqalaqtyń keýde qýysyn rentgen apparatyna túsirý arqyly oń jaq kókireginde jaryqtyń baryn anyqtaǵan.

Ánýar JUMAShBAEV

Medısınalyq tekserýden keıin kishkentaı pasıent hırýrgııa bólimine anasymen birge jatqyzyldy. Keıin eki kún ótken soń dáriger-hırýrgter 4 aılyq sábıge ashyq túrde kúrdeli ota jasaıdy.

Dáriger-hırýrg Qaırat Izbasarovtyń aıtýynsha, operasııa barysynda ókpege qaraı ótip ketken ish qýysyndaǵy ishekter hıýrgııalyq ádispen óziniń ornyna keltirilip, kókirek tusyndaǵy jaryq tigilgen. Kishkentaı sábıge jasalǵan operasııa 1,5 saǵatqa sozyldy. Otadan keıin shaqalaq aǵzasy qalpyna kelgenshe bir kún jansaqtaý bóliminde tıisti em-dom sharalarynan ótip, kelesi kúni palataǵa aýystyryldy.

Qaırat Ilıasuly sábıdiń kókirek tusyndaǵy jaryqtyń kólemi 15 santımetr bolǵanyn aıtady. Mamannyń málimdeýinshe, mundaı jaryqtar keıde adamǵa týa bitedi, ıaǵnı bala anasynyń qursaǵynda jatqanda túrli fızıologııalyq áserdiń saldarynan paıda bolady. Sondyqtan bul ózdiginen týyndaıtyn kesel, medısınalyq praktıkada sırek kezdesetin qubylys retinde qaralady.

Balalar klınıkalyq aýrýhanasynyń dárigerleri búgingi tańda kishkentaı naýqas ózin jaqsy sezinetinin baıandady. Olardyń sózine qaraǵanda, endigi jerde qosymsha operasııa jasaýdyń qajettiligi joq. Sol sebepti ota jasalǵan sábı klınıkada biraz kún jatyp, em-dom qabyldap, anasymen birge aman-esen úıine qaıtaryldy.

ShYMKENT