Mashına jasaý salasyn damytý boıynsha keshendi jospar ázirlenip jatyr

Qazirgi ýaqytta keshendi jospardy ázirleý sheńberinde salanyń qazirgi jaı-kúıine taldaý júrgizilip, túıtkildi máselelerdi anyqtaý jáne olardy sheshý joldary qarastyrylyp jatyr. Jıyn barysynda, ásirese, saladaǵy kadr tapshylyǵy máselesine erekshe nazar aýdaryldy.

«Kadrlyq áleýet - kez kelgen kásiporynnyń joǵary tabysynyń mańyzdy faktory. Kadrlardyń kásibı daıarlyǵy ónim óndirisin keńeıtýge yqpal etip, ishki jáne syrtqy naryqtarda básekege qabilettiligin qamtamasyz etedi. Búginde otandyq mashına jasaý ónerkásibi joǵary bilikti kadrlardyń tapshylyǵy máselesine tap boldy, endi biz bul problemany shuǵyl sheshýimiz qajet», ­dep atap ótti Avtomobıl, arnaıy tehnıka jáne aýyl sharýashylyǵy mashınalaryn jasaý basqarmasynyń basshysy Rýslan Hısamýtdınov.

Bul baǵytta kásiporyn ókilderi oqý jáne ǵylymı uıymdar arasynda tikeleı baılanys ornatýdy, sonymen birge orta kásiptik bilim berý uıymdaryn zamanaýı materıaldyq-tehnıkalyq bazamen qamtamasyz etýdi usynyp otyr.

Sonymen qatar jıynǵa qatysýshylar tehnıkany jobalaý jáne shyǵarý kezinde ónerkásiptik kooperasııany damytý, eksporttyq múmkindikterdi damytý, bıznes tarapynan qarsy mindettemeler bolǵan jaǵdaıda shıkizat pen materıaldardy, sondaı-aq jabdyqtardy satyp alýǵa sýbsıdııalar berý máselelerin kóterdi.

Osy rette keshendi jospardyń negizgi maqsaty naqty óndiris kólemin ulǵaıtý, ónimniń jańa túrlerin óndirý, eksportty arttyrý jáne mashına jasaý salasyndaǵy daıyn ónim ımportyn azaıtý ekenin atap ótken jón.