Úkimet • 31 Qańtar, 2023

Bizge halyqpen ashyq jáne naqty baılanys qajet – Álıhan Smaıylov

Premer-mınıstr Álıhan Smaıylovtyń tóraǵalyǵymen ótken Úkimet otyrysynda mınıstrler men ákimderdiń 2022 jyly qazaqstandyqtarmen kezdesýleriniń qorytyndysy qaraldy, dep habarlaıdy Egemen.kz.

Janbolat Kenjeǵul

Aqparat jáne qoǵamdyq damý mınıstri Darhan Qydyráliniń habarlaýynsha, kóshpeli kezdesýler aıasynda 2022 jyldyń qorytyndysy boıynsha, mınıstrler 216 jeke qabyldaý ótkizip, 1498 azamattyń aryz-shaǵymyn tyńdaǵan. Kezdesýde 1679 problemalyq másele kóterilip, onyń 1241-i (74%-y) sheshildi. Al 438-i memlekettik organdardyń oryndaýynda.

О́z kezeginde, Ulttyq ekonomıka mınıstri Álibek Qýantyrov 2022 jyldyń II jartyjyldyǵynda ákimderdiń halyqpen 19,8 myńǵa jýyq kezdesýleri ótkizilgenin habarlady. Olardyń barysynda turǵyndar áleýmettik jáne turǵyn úı-kommýnaldyq ınfraqurylym nysandaryn salý, ekologııanyń jaıy, joldardy jóndeý, jer máseleleri jáne taǵy basqa suraqtar boıynsha 33,4 myńnan astam (99%) másele kóterip, óz usynystaryn aıtty.

О́ńirlerde halyqpen kezdesýler ótkizý qorytyndysy týraly Almaty oblysynyń ákimi Marat Sultanǵazıev pen Atyraý oblysynyń ákimi Serik Shápkenov baıandama jasady.

Premer-mınıstr suraqtar negizinen turǵyn úı-kommýnaldyq sharýashylyq, qurylys, aýyl sharýashylyǵy jáne jer qatynastary, sondaı-aq baǵa máselesine qatysty ekenin atap ótti.

«Olardyń basym bóligi mınıstrlerdiń halyqpen kezdesýlerinde jergilikti atqarýshy organdardyń qatysýymen sol jerde sheshildi. Al qalǵan máseleler memlekettik organdardyń Is-qımyl josparlaryna engizildi», dedi Álıhan Smaıylov.

Úkimet basshysynyń aıtýynsha, olardyń keıbirine zańnamalyq ózgerister, qosymsha qarjylandyrý nemese basqa vedomstvolardyń sheshimderi qajet. Sondyqtan Is-qımyl josparlaryna engizilgen problemalyq máselelerdi ýaqytyly sheshýdi qamtamasyz etý kerek.

Sonymen qatar Álıhan Smaıylov birqatar mınıstrlikterdiń basshylary kezdesýlerdi aldyn ala habardar ete otyryp, sapaly uıymdastyryp, qorytyndysy boıynsha arnaıy brıfıngter ótkizgenin aıtty. Al, keıbir mınıstrlik basshylary josparlanǵan 15 kezdesýdi ótkizgen joq.

«Bul jerde qandaı da bir syltaý aıtý orynsyz. Eshqandaı sebep qabyldanbaıdy. Barlyq kezdesýler ótkizilýi tıis. Oǵan vıse-mınıstrlerdi de tartý qajet. Bul azamattardy kóbirek qabyldaýǵa múmkindik beredi. Bizge ashyq jáne naqty baılanys qajet. Halyq únine qulaq asatyn memleket úshin mundaı is-sharalar halyqpen qarym-qatynastyń mańyzdy quralyna aınalýǵa tıis», dedi ol.

Premer-mınıstrdiń aıtýynsha, búginde ákimderdiń kezdesýleri jańa formatta ótkiziledi. Bul qatysýshylar sanyn aıtarlyqtaı arttyryp, kóp máseleni sheshýge múmkindik beredi. Esepterge qarasaq, ákimdermen kezdesýlerde problemalardyń shamamen 99%-y sheshimin tabady. Bul oraıda, Aqtóbe, Qostanaı oblystary men Almaty qalasyndaǵy oń tájirıbeni atap ótýge bolady. Al, Almaty, Batys Qazaqstan jáne Atyraý oblystarynda turǵyndardyń problemasyn sheshý kórsetkishteri tómen.

Sondaı-aq Álıhan Smaıylov «e-О́tinish» aqparattyq júıesine kelip túsetin azamattardyń aryzdaryna qaraıtyn bolsaq, basqasha jaǵdaı qalyptasyp otyrǵanyn atap ótti. 2022 jyly osy júıe arqyly 1,7 mln-nan astam adam ótinish berdi jáne qaraldy. Onyń 82%-y jergilikti atqarýshy organdarǵa tıesili.

«О́tken jyldyń ekinshi jartysynda azamattardyń jergilikti bılikke joldaǵan aryzdarynyń sany 16%-ǵa artqan. Budan kóterilgen problemalardyń bir bóligi jergilikti jerlerde sheshimin tappaǵanyn kóremiz. Sondyqtan azamattar óz máselelerin «e-О́tinish» júıesi arqyly sheshýge májbúr bolǵan. Almaty jáne Astana qalalarynda, Qaraǵandy jáne Aqtóbe oblystarynda shaǵymdar sany kóp», dedi Premer-mınıstr.

Onyń sózinshe, turǵyndar qurylys, kólik jáne kommýnıkasııa, turǵyn úı-kommýnaldyq sharýashylyq jáne halyqqa turmystyq qyzmet kórsetý máseleleri boıynsha memlekettik organdar qabyldaǵan ákimshilik aktilerge, olardyń áreketine nemese áreket etpeýine qatysty kóp shaǵym aıtady.

«Sondyqtan ákimdikter jergilikti jerlerde máselelerdi sheshýdiń tıimdiligin arttyrýy qajet. Sonda elektrondy júıe arqyly aryzdardyń azaıǵanyn kóremiz», dedi Álıhan Smaıylov.

Qorytyndylaı kele, Úkimet basshysy árbir ortalyq jáne jergilikti atqarýshy organdar boıynsha problemalyq máseleler kartasyn ázirleýdi, nysanaly toptarmen turaqty kezdesýler ótkizýdi, sondaı-aq kezdesýlerdiń ótetini týraly aldyn ala habarlap, ótken sharalardyń qorytyndysy týraly keńinen jarııalaýdy tapsyrdy.