Lızıngpen alynǵan ádemi dızaındaǵy avtobýstardyń 13-i Aqtóbe qalasyndaǵy mektepterge, 10-y Yrǵyz, Shalqar, Mártók aýdandaryndaǵy bilim oshaqtaryna berildi. Sondaı-aq naýryz aıynda Aqtóbege taǵy da sý jańa 9 avtobýs keledi dep josparlanyp otyr. 4,5 myńnan astam mektep oqýshysyn qaýipsiz tasymaldaý úshin barlyq qajetti quralmen jabdyqtalǵan kólikterdiń ishi keń, keıbiri 40 oryndyq, keıbiri 20 oryndyq avtobýstar.
Oblys mektepteriniń avtoparkterin jańartý birneshe jyldan beri kóterilip júrgen másele edi. Ásirese qala syrtynda turatyn mektep oqýshylaryn tasymaldaý, aýyl balalaryn oblys ortalyǵynda ótetin jarystarǵa aparyp-ákelýge kelgende túrli qıyndyq boldy. Búginde óz kólikteri joq mektepter avtobýstardy jalǵa alyp otyr.
570 oqýshysy bar Mártók aýdany ortalyǵyndaǵy gımnazııaǵa jaqyn eldi mekenderden balalar kelip oqıdy. Alysta turatyn balalardy sabaqqa jetkizip júrgen avtobýs óte eski, júrýinen turýy kóp bolǵandyqtan, ásirese qys mezgilinde balalardyń sabaqqa keshikpeı kelýi mektep basshylyǵynyń bas aýrýyna aınalǵan.
Jańa úlgidegi 40 oryndyq taǵy bir jaıly kólik Yrǵyz gımnazııasyna berildi. Osy gımnazııanyń 500-den astam oqýshysy bar, janynda ınternaty ornalasqan. Endigi jerde gımnazııa ınternatynda jatyp oqıtyn alys aýyldardyń balalaryn kanıkýl bastalǵanda úılerine tegin jetkizip salyp, sabaq bastalarda alyp ketetin bolady. Aıta ketý kerek, Aqtóbe oblysynda byltyr qyrkúıek aıynda on mektep avtobýsy paıdalanýǵa berildi. Alaıda oblystaǵy 408 mekteptiń bárin avtobýspen qamtamasyz etý ázirge múmkin bolmaı otyr.
Aqtóbe oblysy
