Sport • 07 Aqpan, 2023

Jyl úzdikteri anyqtaldy

Halyqaralyq konkımen júgirýshiler odaǵy mánerlep syrǵanaýdan 2022 jyldy qorytyndylap, jyldyń úzdik sportshylaryn marapattady. Shveısarııanyń Sıýrıh qalasynda ótken «ISU Skating Awards» is-sharasynda byltyrǵy jarys jylynda eń joǵary nátıjege qol jetkizgen 8 sportshy ár atalym boıynsha úzdik dep tanyldy.

Álı BITО́RE

Kollajdy jasaǵan Qonysbaı ShEJIMBAI, «EQ»

О́tken jyldyń jeltoqsan aıynda uıymdastyrýshylar 2021/2022 jylǵy maýsymnyń Gran-prı serııasynda úzdik shyqqan jáne 2022 jylǵy qoıylymdar arasynda táýir nátıjemen kózge túsken 6 atalym boıynsha úmitkerlerdiń tizimin jarııalap, 2022 jyldyń 31 jeltoqsanyna deıin aldymen jankúıerler arasynda onlaın saýaldama júrgizdi. Sport jankúıerleri osy ýaqyt aralyǵynda mánerlep syrǵanaýshy (jupqa), jattyqtyrýshy, horeograf, kostıým dızaınerine onlaın daýys berý arqyly jyl úzdikterin anyqtap berdi.

2023 jyldyń qańtar aıynda daýys berý nátıjeleri jarııalanyp, júldeden úmitker sportshylardyń tizimi belgili boldy. Sóıtip ári qaraı «ISU Skating Awards» syılyǵynyń jeńimpazdaryn 1984 jylǵy Olımpıada chempıony, tórt dúrkin álem chempıony ulybrıtanııalyq Krıstofer Dın, jekeleı synda eki dúrkin álem chempıony japonııalyq Mıkı Ando, bes dúrkin Eýropa chempıony, jekeleı synda tórt márte álem chempıonatynyń júldegeri atanǵan Sýrııa Bonalı, álem chempıony Todd Eldrıdj (AQSh), jekeleı synda Eýropa chempıonatynyń eki dúrkin júldegeri Kııra Korpı (Fınlıandııa) jáne 2018 jylǵy Olımpıada chempıony jáne eki dúrkin álem chempıony kanadalyq Erık Redford sekildi mánerlep syrǵanaýdyń dańqty ókilderi tańdap aldy.

Qazylar alqasynyń sheshimi boıynsha, Olımpııa oıyndarynyń jeńimpazy men júldegeri, álem birinshiliginiń úsh dúrkin chempıony 23 jastaǵy Neıtan Chen (AQSh) «Eń baǵaly mánerlep syrǵanaýshy» atalymynda úzdik shyqsa, taǵy bir AQSh ókilderi Medıson Chok pen Evan Beıts 2021/2022 jylǵy maýsymdaǵy erikti bıi úshin «Úzdik kostıým» atalymynda top jardy. Dızaıneri – Medıson Chok.

«Eń tartymdy baǵdarlamasynda» Gabrıela Papadakıs pen Gııom Sızeron (Fransııa) jeńimpaz atandy. Sonymen qatar AQSh sportshysy Izabo Levıto «Jańa esim», She-Lınn Býrn «Eń úzdik horeograf», Patrıs Lozon «Eń úzdik jattyqtyrýshy», eki dúrkin Olımpıada chempıony, tórt dúrkin álem birinshiliginiń jáne alty dúrkin Eýropa chempıony Katarına Vıtt «Mánerlep syrǵanaý ańyzy» atalymdarynda dara shyqty. Sondaı-aq «Erekshe jetistikteri úshin» atalymy mánerlep syrǵanaý sportynyń tarıhynda alǵash ret tórttik aksel baǵdarlamasyn oryndaǵan Ilıa Malınınge buıyrdy.