Elimizde energotıimdilikti arttyrý jobasy júzege asyrylady

ASTANA. 18 maýsym. Elimizdiń energetıkalyq tıimdiligin arttyrýǵa baǵyttalǵan jobany júzege asyrý maqsatynda Úkimet pen Dúnıejúzilik bank arasynda granttyq kelisimge qol qoıyldy. Bul týraly i-news.kz habarlady. Kelisim boıynsha atqarylatyn jumystardyń quny 21,7 mln. dollarǵa baǵalandy. Qujatqa Úkimet tarapynan Premer-Mınıstrdiń orynbasary, Indýstrııa jáne jańa tehnologııalar mınıstri Áset Isekeshev, al Dúnıejúzilik bank jaǵynan atalǵan qarjy uıymynyń Qazaqstandaǵy turaqty ókili Shebnem Akkaıa qol qoıdy. Áset Isekeshevtiń aıtýynsha, kórsetilgen qarjy energetıka salasyn qarjylandyrýdyń turaqty mehanızmderin qurýǵa jáne eldegi ınstıtýsıonaldyq bazany jaqsartýǵa jumsalmaq. Sondaı-aq, ol: «Jobany júzege asyrý kezinde eldiń barlyq oblysyndaǵy memlekettik, áleýmettik mańyzy bar nysandardyń modernızasııalanýy josparlanyp otyr. Solardyń ishinde 20 mektep pen balabaqsha, 5 aýrýhana jáne tehnıkalyq jaryq berý jobasy jańǵyrtylady. Sondaı-aq, bul nysandarda energııa únemdeý jobasy daıyndalady», – dedi. Joldybaı Bazar. Derekkóz: i-news.kz. Foto: i-news.kz.