Qostanaı oblysynda eki jańa ákim taǵaıyndaldy

ASTANA. 18 maýsym. Qostanaı óńiriniń basshysy Nuraly Sádýaqasovtyń ókimimen oblys ortalyǵy men Qostanaı aýdanynyń jańa ákimderi bekitildi. Bul týraly oblys ákiminiń resmı saıty habarlady. Qalalyq máslıhattyń sheshimi negizinde jáne oblys ákiminiń ókimimen Ahmedbek Masaqbaıuly Ahmetjanov Qostanaı qalasynyń ákimi bolyp taǵaıyndaldy. A.Ahmetjanov 1966 jyldyń 8 jeltoqsanynda Qostanaı oblysy Arqalyq aýdany Saryózen aýdanynda týǵan. Joǵary bilimdi. 1991 jyly Qaraǵandy kooperatıv ınstıtýtyn ekonomıst, al 2001 jyly Qostanaı memlekettik ýnıversıtetin zańger mamandyǵy boıynsha bitirgen. Eńbek jolyn 1991 jyly Qostanaı oblysy Áýlıekól aýdany Sulýkól keńsharynda jumysshylar kooperatıvi tóraǵasynyń orynbasary bolyp bastaǵan. 1992-1996 jyldar aralyǵynda  Áýlıekól aýdanyna qarasty «Novo-Nejınsk» keńsharynda jumysshylar kooperatıviniń tóraǵasy bolǵan. 1998-2007 jyldar ishinde oblys aýmaǵyndaǵy salyq salasynda basshylyq qyzmetter atqarǵan. 2007-2010 jyldar aralyǵynda Taran aýdanynyń, 2010 jyldyń qyrkúıeginen osy ýaqytqa deıin Qostanaı aýdanynyń ákimi boldy. 2009 jyly «Qurmet» ordenimen marapattaldy. Sol sııaqty, oblys basshysynyń ókimimen ári aýdandyq máslıhat depýtattarynyń sheshimi negizinde Qostanaı aýdanynyń ákimi bolyp Táýba Qaıyrjanuly Isabaev bekitildi. Táýba Isabaev 1967 jyldyń 29 qyrkúıeginde Aqmola oblysy Stepnogorsk qalasynda týǵan. Bilimi joǵary. 1993 jyly Aqmola ınjener-qurylys ınstıtýtyn ınjener-mehanık mamandyǵy boıynsha bitirgen. Eńbek jolyn 1985 jyly qarapaıym jumysshy retinde bastaǵan. 1993-2005 jyldar aralyǵynda Aqmola oblysy Seletın aýdanynda jáne atalǵan oblys ákimi apparatynda túrli qyzmetter atqarǵan. Al 2005 jyldyń naýryzynan osy taǵaıyndaýǵa deıin Qostanaı oblysy ákiminiń is júrgizýshisi ári apparat basshysynyń orynbasary qyzmetin atqaryp kelgen. 2002 jyly «Eren enbegi úshin» medalimen marapattalǵan. Joldybaı Bazar. Derekkóz: Qostanaı oblysy ákiminiń resmı saıty. Foto: odk.kz.