2020 jyldan bastap Sybaılas jemqorlyqqa qarsy qyzmet júrgizýshi kýálikterin zańsyz berýge jáne sheteldik avtomobılderdi esepke qoıýǵa baılanysty 18 qylmystyq isti tergedi.
Máselen, júrgizýshi kýáligin berý kezinde 60 myńǵa jýyq zańsyz is-áreket jasaldy, al zańsyz ákelingen 2 myńnan astam avtokólik esepke qoıyldy.
Qylmystardyń basym bóligi Astana, Shymkent qalalarynda, Aqmola, Qostanaı jáne Jambyl oblystarynda jasalǵany anyqtaldy. Nátıjesinde, 13 adam qylmystyq jaýapkershilikke tartyldy.
«Elordada kózdelgen alymdar men tólemderdi tólemeı, shetelden ákelingen avtokólikterdi tirkeý esebine zańsyz qoıýmen aınalysatyn Arnaıy HQKO qyzmetkerleri men azamattyq tulǵalardan turatyn uıymdasqan qylmystyq toptyń qyzmeti toqtatyldy. Qylmystyq top azamattardy sheteldik avtokólikterdi esepke qoıýdyń zańdylyǵyna qatysty aldaý jolymen, olardyń aqshalaryn urlap, 500-ge jýyq kólik quralyn zańsyz tirkeýdi júzege asyrdy. Bir kólik quralyn resimdeý avtokólik júrgizýshilerine 400 myńnan 1,6 mln teńgege deıin shyǵyn keltirdi. Atalǵan adamdardyń qylmystyq is-áreketiniń nátıjesinde memleketke tólenbegen memlekettik bajdar men alymdar túrinde shamamen 1 mlrd.teńge somasyna zalal keltirildi», delingen ANTIKOR habarlamasynda.
Tergeý sotynyń sanksııasymen qylmystyq toptyń 9 qatysýshysy, onyń ishinde elordalyq Arnaıy HQKO basshysy qamaýǵa alyndy. Qazirgi ýaqytta sotqa deıingi tergeý júrgizilip jatyr.
