Baǵdarlamadaǵy jańa ózgeristerge sáıkes, budan bylaı týroperatorlardyń ótinimderi Kazakh Tourism-ge túsken kúnnen bastap 7 jumys kúni ishinde maquldanady. Buǵan deıin ótinishter 10 jumys kúniniń ishinde qarastyrylatyn edi. Sondaı-aq tólem merzimi 45 kúnnen 25 kúnge deıin qysqartylyp, endi Kazakh Tourism ulttyq kompanııasy sýbsıdııa somasyn tikeleı týroperatorlardyń esepshotyna aýdarýdy júzege asyrady.
«Jańa erejege saı, ótinimderdi qaraý merzimi 7 jumys kúni dep belgilengenimen, Kazakh Tourism olardy barynsha qysqa merzimde maquldaýǵa tyrysady. 2022 jyldyń qorytyndysy boıynsha sýbsıdııalardy qaraýdyń jáne tóleýdiń naqty merzimi orta eseppen 10 jumys kúnin qurady. Sýbsıdııalar 4 jumys kúni ishinde tólengen jaǵdaılar da bolǵan», delingen resmı habarlamada.
Erejege engizilgen budan basqa ózgeristerge sáıkes, balalar áýebıletin satyp alýdy rastaý tizbesi keńeıtildi. Eger buryn ótinimge áýebılettiń kóshirmesin qosa berý qajet bolsa, qazir áýekompanııadan bıletti paıdalaný týraly marshrýttyq túbirtekti nemese rastaý anyqtamasyn qosa berýge bolady.
2022 jyldyń qorytyndysy boıynsha, Kids go free baǵdarlamasy aıasynda týroperatorlarǵa 700-ge jýyq ótinim túsip, balalar áýebıleti úshin memlekettik qazynadan 76 mln teńge kóleminde sýbsıdııa bólingen. Týr aıasynda el boıynsha 1,5 myńǵa jýyq bala tegin ushqan. Ázirge eń tanymal baǵyt Aqtaý qalasy bolyp tur. Bir jyldyń ishinde munaıly mekenge 350-den asa týrpaket satylǵan.
Tegin áýe bıletteri ázirge týrıstik salany damytýdyń 2019-2025 jyldarǵa arnalǵan memlekettik baǵdarlamasynda aıqyndalǵan basym týrıstik aımaqtardyń (BTA) úzdik 10 baǵyty boıynsha ǵana qoljetimdi. Olarǵa myna aımaqtar kiredi: Alakól kóli, Almaty óńiriniń taý klasteri, Shýche-Býrabaı, Baıanaýyl Imantaý-Shalqar kýrortty aımaqtary, Balqash kóli, Túrkistan oblysy, Mańǵystaý jaǵajaı demalys aımaqtary, Astana qalasynda MICE-týrızmdi damytý korporatıvtik is-sharalardy uıymdastyrý jáne ótkizýge baılanysty iskerlik týrızm jáne Baıqońyr ǵarysh aılaǵy.
Tegin bıletter men balalar sanyna shekteý joq. Degenmen saparǵa shyǵý aldynda mynadaı birneshe jaıtty eskergen jón. Máselen Kids go free qosylǵan týrıstik ónimdi satyp ala otyryp, balalar týrıstik oryndardyń aýmaǵynda keminde bes kún jáne tórt tún turýǵa mindetti. Eger siz birden birneshe jerge barýdy josparlasańyz, onda kem degende eki kún jáne bir tún sol orynda bolýyńyz kerek. Turý ýaqytynyń jalpy sany bes kúnnen jáne tórt túnnen kem bolmaýy qajet. Bul jaǵdaıda balalarǵa arnalǵan tegin áýe bıletteri birinshi lokasııadaǵy áýejaıǵa deıin jáne sońǵy lokasııadaǵy áýejaıdan usynylady. Iаǵnı siz bir emes birneshe ret ushýdy kózdeseńiz, eń alǵashqy jáne sońǵy reıstiń bıleti ǵana tegin bolady. Eki mekenjaıdyń arasyndaǵy bıletter men kólik shyǵyndaryn óz qaltańyzdan tóleısiz. Sondyqtan ár jerde keminde bes kún jáne tórt tún turý arqyly týrıstik qyzmetterdi satyp alǵan tıimdi. Osy sharttar boıynsha balalarǵa arnalǵan tegin bıletter barlyq jerdegi áýejaı arasynda usynylady.
Kazakh Tourism ulttyq kompanııa ókilderiniń aıtýynsha, mundaı baǵdarlamanyń memleket deńgeıinde qoldanylýy – álemdik tájirıbede bolmaǵan jaǵdaı. Zań kúshine engen baǵdarlama merzimsiz ýaqytqa qabyldanǵan. Osy jylǵa bıýdjette baǵdarlamamen kem degende 20 myń balany qamtý kózdelse, suranys artqan jaǵdaıda, qosalqy qarajat tartylatyny eskerilgen. Eki jyl boıy pandemııadan zardap shekken týrızm salasyna endigi kezde jańadan dem berildi dese bolady. Kids go free arqyly el ishinde saıahattaımyn deıtin januıaǵa 30%-ǵa deıin únemdeý múmkin bolyp otyr.
