ASTANA. 18 maýsym. О́tken túnde chempıonattyń ekinshi týrynyń oıyndary da bastaldy. Ol A tobyndaǵy Brazılııa – Meksıka quramalary arasyndaǵy matchpen ashyldy. Kezdesýde birinshiliktegi ekinshi teń oıyn jazyldy. Sonymen birge, munda alǵash ret 0:0 degen esep tirkeldi. Bul týraly egeven.kz habarlady.
Brazılııa – Meksıka 0:0.
17 maýsym. Fortaleza. «Kastelan» stadıony. 60 342 kórermen. Tóreshi - Djýneıt Chakyr (Túrkııa).
Brazılııa: Jýlıo Sezar, Danı Alves, Tıago Sılva, Davıd Lýıs, Marselo, Lýıs Gýstavo, Paýlıno, Ramıres (Bernard, 46), Oskar (Vıllıan, 84), Neımar, Fred (Jo, 68).
Meksıka: Gılermo Ochoa, Paýl Agılar, Fransısko Rodrıges, Rafael Markes, Mıgel Laııýn, Ektor Errera (Marko Fabıan, 76), Andres Gýardado, Hose Vaskes, Djovanı dos Santos (Raýl Hımenes, 84), Orıbe Peralta (Haver Ernandes, 73).
Eskertýler: Ramıres (45), Tıago Sılva (79) – Paýl Agılar (59), Hose Vaskes (62).
Oıynda brazılııalyqtar meksıkalyqtardyń qarsylyǵyn basa almaı, mýndıaldaǵy birinshi múlt keterin jasap aldy. Biraq bul olar úshin onshalyqty bir taǵdyr shesherlik oqıǵa bolǵan joq. Sebebi, pentakampeondar endigi qalǵan sońǵy týrda toptyń aýtsaıderi – Kamerýnmen ushyrasady. Eki komanda da osy teń oıynnyń nátıjesinde tórt upaı jınady. Match barysynda Skolarıdiń shákirtteri dopqa kóbirek egelik etip, terrıtorııalyq basymdyq pen ınısıatıvaǵa ıe boldy. Al Erreranyń komandasy búkil oıyn boıyna qorǵanysqa aıryqsha kóńil bólip, qatań tártip ustandy.
Meksıkalyqtar sanaýly ǵana oıynshylarynyń qatysýlarymen oqta-tekte ǵana qarsy shabýyldarǵa shyǵyp turdy. Olardyń mundaǵy negizgi qarýlary alystan soqqy jasaý boldy. Bul soqqylardyń deni qaqpa janynan ushyp ótip, pálendeı qaýip tóndire qoıǵan joq. Al qanshama múmkindikten nátıje shyǵara almaı, golkıper Gılermo Ochoanyń «jemine» aınala bergen «selesao» shabýylshylary buǵan ózderin ǵana kinálaýlary kerek. Skoları keıin alańǵa shyǵarǵan úsh fýtbolshy da shabýyldy kúsheıte túsýge úles qosty. Biraq bulardyń barlyǵy da qaqpa qulpyn ashýǵa dármensizdik tanytty.
Ádildigin aıtqanda, Brazılııa quramasy gol soǵýǵa qanshama múmkindik alǵanyna qaramastan, tutastaı alǵanda, joǵary deńgeıdegi oıyn kórsete almady. Bul jaǵynan onyń oıyny maýsymashar matchtaǵydan joǵary bola alǵan joq. Al meksıkalyqtar qorǵanysqa qatty kóńil bólýleri men qaqpashysynyń qateliksiz oıynynyń arqasynda teń nátıjege qol jetkizdi.
Damır Qojamqul.
Derekkóz: egemen.kz.
Foto: Sportbox.ru.
