Qys túskeli ınjenerlik jelileriniń 62 paıyzy tozyp ketken qalanyń jylý, sý, káriz qubyrlary qaıta-qaıta jaryla bergen soń, osy aptanyń basynda qala ákimdigi jergilikti aýqymdaǵy tehnogendik tótenshe jaǵdaı jarııalaýǵa májbúr bolǵan.
Toń jibip, jylý maýsymy aıaqtalǵanǵa deıin jalǵasatyn tótenshe jaǵdaı apat bola qalǵan jaǵdaıda jedel qımyldap, qosymsha kúshterdi jumyldyrýǵa, qajetti qarjyny da ýaqyt sozbaı jyldam bólýge múmkindik bermek. Tórt aıǵa jýyq ýaqyt ishinde jylý jáne sý qubyry 74 ret jarylyp, ondaǵan turǵyn úı men bıznes nysandary táýliktep jylýsyz qalǵan qalada qar kóbesi sógilip, kún jylynǵansha, qubyrdyń jarylýy qalypty qubylysqa aınalatyn syńaıly.
Jergilikti bılik ókilderiniń aıtýynsha, Gornıakov kóshesindegi jerasty qubyrlary shirı-shirı juqaryp, kádimgi folga qaǵazy sııaqty bolyp qalǵan. 2022 jyly qalanyń jylý jelisin jóndeýge 5,5 mlrd teńge jumsalyp, birneshe kóshede qubyr aýystyrylǵan. Bul kóshelerde bıyldyqqa birde-bir qubyr jarylǵan joq. Al jer astynan jik shyǵyp jatqan kóshelerdegi qubyrlar kópten beri jóndeý kórmegen.
«Indýstrııa jáne ınfraqurylymdyq damý mınıstrligine aldaǵy jazda júrgiziletin jumystarǵa bólinetin qarjyny naqtylap berýdi ótinip, arnaıy saýalhat joldadyq. Tek Rýdnyı qalasynyń jylý jelilerin jóndeýden ótkizý úshin shamamen 11 mlrd teńge qarjy kerek» deıdi qala ákimdiginiń ókilderi.
Jylý jelileriniń jalpy jaı-kúıine toqtalar bolsaq, tek Rýdnyıda ǵana emes, búkil oblys kólemindegi jaǵdaı máz emes. О́ńirdegi jylýmen qamtý jelileriniń jalpy uzyndyǵy 810 shaqyrym bolady. Onyń 57 paıyzy tozǵan. Tozyǵy jetken qubyrlardyń deni qalalyq mekenderde jatyr.
Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Almat Ǵapbasovtyń aıtýynsha, 2022 jyly óńirde 19 shaqyrym jylý jelisi jóndeýden ótken. Byltyr jalpy quny 8,6 mlrd teńge bolatyn 5 joba boıynsha jelilik jóndeý jumystary bastalypty. Bul jumystar áli de júrip jatyr. Atalǵan jobalardy oıdaǵydaı aıaqtaý úshin bıyl taǵy 1 mlrd teńge bólinipti.
2023 jyly 4 shaqyrym jylý jelisi jańartylady. Qańtar aıynda ótken jıynda respýblıkalyq bıýdjetten 17,1 mlrd teńge qarjyǵa 9 joba qolǵa alynatyny aıtyldy. Bul jobalar júzege asyrylsa, oblystaǵy tozyǵy jetken jylý jelileriniń kórsetkishi 57 paıyzdan 55 paıyzǵa deıin kemıdi, – dedi basqarma basshysy.
Aldaǵy kúnderi munan ózge taǵy 41 shaqyrym jylý jelisin jóndeýden ótkizý jónindegi jalpy quny 17 mlrd teńgege jýyq 12 joba saraptamaǵa jiberilmek.
Qostanaı oblysy
