QazMÝ-dyń jýrnalıstıka fakýltetin tamamdaǵan jas qalamgermen birge kezdesýge onyń ákesi Baqtııar men anasy Ǵalııa da keldi.
Ádebı keshti qoǵam qaıratkeri, birneshe kitaptyń avtory, kezinde shahardyń mádenıet salasyn basqarǵan eńbek ardageri Kúlııa Aıdarbekova júrgizdi.
«Jámılamen kezdesýdi aldyn ala josparlamadyq. Sondyqtan búgingi is-sharanyń shynaıy ótetinine senimdimin. Qalamgerin kútken qalyń oqyrmandy kórip, kóńilim marqaıyp qaldy. Oqyrmannyń júregin jaýlaǵan naǵyz qalam ıesi ekenin sodan sezindim. Jámılanyń basynan ótken qıly taǵdyryn baıandaıtyn bul kitap meni birden baýrady. Jata-jastana oqydym. Osylaısha, qalamger qyzdyń qarym-qabiletin moıyndadym.
Qazirgi qoǵamda kóp áke balalary aýyr dertpen aýyryp qalsa, anasynan kórip, otbasyn tastap ketip jatady. Sondaı kezde búkil qıyndyq ananyń ıyǵyna túsedi. Osyndaı aýyrtpalyqty qaıyspaı kóterip júrgen batyr analarymyz búgingi qoǵamda qanshama. Al Baqtııar kerisinshe, árdaıym qyzynyń qasynan tabyldy. Janyna jebeý boldy. Qyzyn dertti jeńip shyǵýǵa jigerlendirdi. Alla Taǵala eshkimdi balamen synamasyn, áke-shesheniń kóziniń qarasy men aǵyndaı balapandary aman bolsyn», dedi aqjarma tilegin arnaǵan K.Aıdarbekova.
Ádebı keshte taqyrypqa oraı kitaphananyń kórkemónerpazdar ujymy usynǵan sahnalyq qoıylym kórsetilip, án-jyrdan shashý shashyldy.
Sodan soń «Báısheshek» kitabynyń mátinin aýdıonusqada oqyǵan dıktorlar tebirene sóz sóılep, júrektiń túkpirin qozǵaǵan kitap mazmuny týraly, oqý barysynda bosaǵan kóńilden kóz jastaryn tyıa almaı, talaı ret jylap alǵandaryn aıtty. Al ózbek qalamgeri Zakırjan Momınjanov kitapty ózbekshege tárjimalap, ony aýdıojazbada oqyǵan dıktor qalalyq ózbek drama teatrynyń ártisi Dılfýza Ibragımjanova keleshekte teatr ujymy «Báısheshek» kitabynyń jelisinde arnaıy spektakl qoıýdy josparlap jatqanyn, jas jazýshynyń óleńderine án shyǵarý oıda bar ekenin jetkizdi.
Shyǵarmashylyq kezdesý keshinde kitap avtory Jámıla Baqtııarqyzy sóz alyp, osynaý is-sharany uıymdastyrǵan kitaphana ujymyna, barsha jınalǵan jurtqa alǵysyn bildirdi.
«Meniń asyl da aıaýly oqyrmandarym, tilekshilerim. Sizdermen qaýyshqanyma óte qýanyshtymyn. Ádebıet álemine qadam basqan kishkentaı «Báısheshegimdi» kókke kóterip jatqan kitaphana qyzmetkerlerine alǵysym sheksiz. Astanada ákem ekeýmiz Shymkenttegi biz tórinde otyrǵan kitaphananyń meniń shyǵarmamdy aýdıokitap etip ázirlegenin estigende, sener-senbesimizdi bilmeı qatty qýanǵanymyz esimde. Shyny kerek, bul kitapty jazýdy bastaǵanda kóńilde kóp kúmán boldy. Jalpy, bul jazǵanym erteń óz oqyrmanyn taba ma degen. Kóp ýaıymdadym. Biraq júrekten shyqqan dúnıe júrekke jeter degen senimmen sońyna deıin jazyp bitirdim. Sezimim aldamaǵan eken. Qalamymnan týǵan shyǵarmam orys, ózbek tilderine aýdarylyp, oqyrmandar júreginen oryn alyp keledi. О́z basym arnaıy kitaphanaǵa kelgen oqyrmandardy naǵyz qaharman sanaımyn. Álemge shýaq nuryn shashyp júrgen jandar naǵyz sizdersizder. Kúndelik retinde taǵdyrymnyń jelisinde jazylǵan kitapty QazMÝ-da oqyp júrgende osydan 3-4 jyl buryn bastaǵanmyn. Alaıda pandemııa kezinde qalamymdy qańtara turýǵa týra keldi. Keıin qalamymdy qaıta qolǵa alyp, jazýǵa kiristim. Men áli jaspyn, ómirdi kórip úlgergen adam emespin. Alaıda taǵdyrdyń synaǵy jas-kárige qaramaıdy. Sondyqtan tek senim men erik-jiger aýyr synaqty jeńip shyǵýǵa kómektesedi. Bul kitap aldaǵy ýaqytta áli talaı oqyrmannyń júregine jol taýyp, álemdi sharlaıtynyna senimdimin. Alla Taǵala myna ómirdegi bárimizdiń synaǵymyzdy jeńildetsin, eń bastysy qandaı taýqymetke tap kelsek te, Qudaıdan úmitimizdi úzbeıik. Shyn yqylaspen sengen adam basyna qandaı synaq tónse de túbinde ony jeńip shyǵady. Sol úshin eń áýeli senim arqyly ishki rýhymyzdy bekitip alýymyz kerek. Kitaptyń negizgi baıandaıtyn mazmuny osyǵan kelip saıady», dedi avtor.
Jas qalamger Jámıla Baqtııarqyzynyń alǵashqy týyndysy 2021 jyly jaryq kórgen. Kitaptyń «Báısheshek» atalýynyń da ózindik syry bar. Bárimiz biletindeı, báısheshek kóktemniń kelgeninen alǵash habar beretin, qara topyraqty, aq qardy birinshi bolyp jaryp shyǵatyn adal da ójet gúl. Kitap avtorynyń da taǵdyry osy báısheshekke uqsas. Jaratýshyǵa degen adaldyǵy, kúreskerlik minez ben ójettigi arqyly basqa salǵan aýyr synaqtan aman ótip, on jyl aıqasqan aýyr dertinen qulan-taza aıyǵyp, áke-sheshesiniń, týystarynyń júzine qýanysh shýaǵyn syılaı bildi. Al taǵdyr synaǵymen kúresýge jetelegen bula kúsh bul senim boldy.
«Bul kitap qıyndyqty asqan sabyrmen ótkizgen jap-jas jannyń júrek lúpilinen kelgen ımanı habar. «Báısheshek» –taǵdyr týraly jazylǵan kitap» dep baǵa beripti belgili jazýshy Áshirbek Kópish kitaptyń alǵy sózinde.
Shymkenttegi oqyrmandarmen kezdesýlerden bólek, ádebı shyǵarmashylyq kesh talantty jas qalamgerdiń týǵan jeri Túrkistan oblysy Tólebı aýdanyndaǵy Kóksáıek aýylynda da uıymdastyryldy.
ShYMKENT
