Buǵan deıingi rekord búkil karerasynda 38 387 upaı jınaǵan taǵy bir amerıkalyq áıgili basketbolshy jáne dál sol «Los-Andjeles Leıkerstiń» dańqty oıynshysy bolǵan 75 jastaǵy Abdýl-Djabbarǵa tıesili edi. Ol bul nátıjeni 1984 jyldyń 5 sáýirinde ornatqan bolatyn. Bir qyzyǵy, 38 jastaǵy Lebron Djeıms osy rekord ornatylǵannan keıin toǵyz aıdan soń, ıaǵnı 1984 jyldyń 30 jeltoqsanynda dúnıege kelgen eken.
«Los-Andjeles Leıkers» pen «Oklahoma-Sıtı Tander» arasyndaǵy matchty arenadan tamashalaǵan Abdýl-Djabbar Lebronnyń rekordtyq upaı ákelgen soqqysyna qol shapalaqtap yqylasyn bildirip, kezdesýden keıin ony aıtýly jetistigimen arnaıy quttyqtady.
– Lebron bul rekordtyń ıesi atanýǵa ábden laıyq basketbolshy dep esepteımin. Ol 20 jyl boıy turaqty oıynynyń arqasynda barlyq ataq-dańqqa laıyq sportshy ekenin kórsetti. Osy ýaqyt aralyǵynda ol tynymsyz eńbek etip, úsh birdeı komandaǵa Ulttyq basketbol lıgasynyń chempıony degen ataqty alyp berdi. Sondaı-aq budan basqa da tolyp jatqan ataqtarǵa qol jetkizdi. Ony taǵy bir baǵyndyrǵan belesimen quttyqtaımyn, – dedi K.Abdýl-Djabbar.
Rasymen, Lebron Djeıms bul rekordtyq kórsetkishti jańartý úshin 20 jyl ómirin arnady. Karerasyn 2003 jyly «Klıvlend Kavalers» klýbynda bastaǵan amerıkalyq basketbolshy keıinnen 2010-2013 jyldar aralyǵynda «Maıamı Hıt», 2014-2018 jyldary «Klıvlend Kavalers» jeıdesinde óner kórsetse, 2018 jyldan bastap AQSh-taǵy eń ataqty komandalardyń biri – «Los-Andjeles Leıkerstiń» namysyn qorǵap keledi.
«Leıkers» jankúıerlerine erekshe alǵys aıtqym keledi. Men úshin Karım sııaqty basketbol ańyzymen bir qatarda turý, onyń rekordyn jańartý – úlken mártebe. Qurmetti jankúıerler, kapıtanymyz Abdýl-Djabbarǵa oryndaryńyzdan turyp, qol shapalaqtasańyzdar eken. Ol kez kelgen qurmetke laıyq sportshy. Sondaı-aq keıingi 20 jylda qasymda bolǵan otbasyma, dostaryma jáne meni qoldaǵan barshańyzǵa erekshe alǵysymdy bildiremin», dep aǵynan jarylǵan Lebron kórermen toly arenada kóz jasyna erik berip.
Ogaıo shtatynyń Akron qalasynda dúnıege kelgen Lebron Reımon Djeımstiń basketbol sportynda baǵyndyrmaǵan belesi kemde-kem. Ol – 2008 jyly Qytaıdyń bas shahary Beıjińde uıymdastyrylǵan Olımpııa oıyndarynyń jáne 2012 jylǵy Londondaǵy tórtjyldyqtyń basty dodasynyń jeńimpazy, Afıny Olımpıadasynyń qola júldegeri (2016 jyly). Sondaı-aq 2005 jylǵy Amerıka qurlyǵynyń chempıony jáne 2006 jyly Japonııada ótken álem birinshiliginiń qola medal ıegeri.
Sonymen qatar ol Ulttyq basketbol lıgasynyń tórt dúrkin chempıony, UBL fınaldarynda tórt márte eń qundy oıynshy dep tanylyp, 2007/08 jylǵy basketbol maýsymynda eń kóp upaı jınaǵan oıynshysy jáne 2003/04 jylǵy chempıonattyń jyl jańalyǵy atandy. 2012, 2016 jyldary Sports Illustrated jýrnalynyń nusqasy boıynsha AQSh-tyń jyl sportshysy ataǵyna ıe bolsa, 2012, 2013, 2016 jyldary jyldyń úzdik sportshysyna beriletin ESPY syılyǵyn jeńip aldy.
Al basketbol álemindegi bir rekordynan aıyrylǵan Karım Abdýl-Djabbaar 1947 jyldyń 16 sáýirinde AQSh-tyń Nıý-Iork qalasynda dúnıege kelgen. Karerasynda nebári eki-aq klýbta oınaǵan ol 1969-1975 jyldar aralyǵynda «Mılýokı Baks» sapynda óner kórsetse, 1975-1989 jyldary «Los-Andjeles Leıkers» komandasynda oınap, 42 jasynda úlken sportpen qoshtasty. Karım bir rekordynan aıyrylǵanymen, áli onyń jańarmaı kele jatqan birneshe rekordy bar.
Atap aıtar bolsaq, ol matchtar sany (1560), oınaǵan mınýttar (57 446), gol soǵylǵan doptar (15 837), sebetiniń janyndaǵy jeńister sany (9394), karerasyndaǵy jeńister (1074) jáne jeke oıyndar sany boıynsha UBL-da áli de kóshbasshy sanalady. Ol jeke jeńisteri boıynsha da Ulttyq basketbol lıgasynyń absolıýtti kóshbasshy bolyp qala beredi.
