Bul – áne-mine zeınetke shyǵamyn dep otyrǵan azamattardy laıyqty jumyspen qamtyp, demep jiberetin járdemshi joba. Eńbek jáne halyqtyń áleýmettik qorǵaý mınıstrliginiń málimeti boıynsha 2022 jyly «Kúmis jas» jobasyn iske asyrý aıasynda 3 080 adam jumysqa ornalastyryldy. Atalǵan ıgi bastama 2022 jyly kásipkerlikti damytý jónindegi 2021-2025 jyldarǵa arnalǵan Ulttyq joba sheńberinde iske qosyldy.
«Kúmis jas» arqyly jumysqa ornalasqandardyń eń kóp sany Almaty (570 adam), Túrkistan (516 adam) jáne Qaraǵandy (322 adam) oblystarynda tirkeldi. Osy oraıda bul sanattaǵy azamattarǵa jumys taýyp berýshilerge de memleket tarapynan qoldaý kórsetilip jatqanyn atap ótý kerek.
Bul jobaǵa, joǵaryda aıtqandaı, zeınetkerlikke shyǵýǵa birer jyl qalǵan jumyssyz azamattar qatysa alatyn edi. Endi bıyldan bastap jobaǵa qatysýshylardyń aýqymy ulǵaıtylyp, 50 jasqa tolǵan adamdardyń qatysýyna da múmkindik berile bastady.
«2023 jyldyń 1 qańtarynan bastap jobany iske asyrý qaǵıdalaryna ózgerister engizildi. Endi oǵan 50 jasqa tolǵan adamdar qatysa alady. Bul rette memleketten jumys berýshige jobaǵa qatysýshylardyń jalaqysynyń belgilengen mólsheriniń 60-tan 70%-yna deıin, biraq 30 aılyq eseptik kórsetkishten aspaıtyn mólsherde sýbsıdııa tólenedi. «Kúmis jas» jobasyna qatysý uzaqtyǵy 36 aıǵa deıin. Osydan keıin jumys berýshi «Qazaqstan Respýblıkasynda zeınetaqymen qamsyzdandyrý týraly» zańda belgilengen zeınetkerlik jasqa tolmaǵan adamdy keminde 1 jyl merzimge, al zeınetkerlik jasy aldyndaǵy (58 jastan asqan) adamdy zeınetkerlikke shyqqanǵa deıin turaqty jumys ornyna ornalastyrady», dep habarlady tıisti vedomstvoǵa qarasty Halyqty jumyspen qamtý departamenti dırektorynyń orynbasary Aıjan Japalbaeva.
Jyl basynan beri jergilikti jerlerde atalǵan máseleni sheshýde tıimdiligin kórsetken bul joba jóninde qatysýshylar ǵana emes, sonymen qatar jumys berýshiler oń pikirin bildirip jatyr.
«Áýlıekóldiń ortalyǵynda «Mınýtka» dep atalatyn ashanam ornalasqan. Jumyspen qamtý ortalyǵynyń mamandary jumys berýshilermen kezdesý uıymdastyryp, onda memleket sýbsıdııalaıtyn jumys oryndary týraly aıtyp berdi. Men «Kúmis jas» jobasyna qyzyǵýshylyq tanytyp, ótinim berdim. Al 1 aqpannan bastap maǵan eki áıeldi jiberdi. Olar – Lıýdmıla Raızer men Svetlana Maıor. Men memleketten jumys berýshiler de, 50 jastan asqan, jumys tabý qıynyraq adamdar da qoldaý alatynyna qýanyshtymyn», dedi jeke kásipker Qarlyǵash Rahmatýllına.
