Eki eldiń syrtqy saıası vedomstvolarynyń basshylary kezdesý barysynda Qazaqstan men Portýgalııa arasyndaǵy saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyqtyń qazirgi jaǵdaıy men damý perspektıvalaryn talqylady. Halyqaralyq kún tártibindegi birqatar ózekti másele sóz boldy. Taraptar ınstıtýsıonaldyq tetikterdi jetildirý, ózara saýdany ártaraptandyrý, tranzıt-kóliktik baǵyttardy damytý, sondaı-aq sıfrlandyrý, IT ındýstrııa, «jasyl» energetıka, týrızm, bilim berý sekildi salalarda kooperasııany jandandyrý qajettigin atap ótti.
Sondaı-aq shart-quqyqtyq bazany odan ári keńeıtýge jáne saıası dıalogti damytýǵa erekshe nazar aýdaryldy. Yntymaqtastyqtyń perspektıvaly salalaryn jandandyrý, memlekettik jáne bıznes qurylymdar arasyndaǵy tikeleı baılanystardy yntalandyrý úshin eki eldiń Úkimetaralyq komıssııasy men Iskerlik keńesin tezirek qurý qajet. Kezdesý barysynda bul másele de áńgimege arqaý boldy. Budan bólek, Qazaqstan azamattaryna vızalyq rejimdi jeńildetý máselesi jeke talqylandy.
Mınıstr J.Kravınıý Qazaqstan SIM basshysynyń Lıssabonǵa sapary ózara is-qımyldyń barlyq salasy boıynsha yntymaqtastyqty odan ári arttyrýǵa qosymsha serpin beretinine senim bildirdi. «Portýgalııa Qazaqstandy Ortalyq Azııanyń strategııalyq perspektıvaly aımaǵyndaǵy mańyzdy jáne senimdi seriktes retinde qarastyrady. Biz kópqyrly yntymaqtastyqty nyǵaıtýǵa jáne saýda-ekonomıkalyq ózara is-qımyldy keńeıtýge qolǵabys kórsetýge daıynbyz», dedi J.Kravınıý.
О́z kezeginde M.Tileýberdi áriptesin Qazaqstanǵa shaqyrdy. J.Kravınıý usynysty qýana qabyldap, bıyl bıznes-delegasııamen birge Astanaǵa kelýge daıyn ekenin habarlady.
Qazaqstandyq delegasııanyń Taguspark ǵylymı-tehnologııalyq parkiniń basshylyǵymen kezdesýi óte jemisti ótti. Onda 160-tan astam jetekshi transulttyq jáne eýropalyq tehnologııalyq kompanııa jumys isteıdi. Taguspark basqarma tóraǵasy Edýardý Baptıshta Korrea jáne IT, baǵdarlamalyq qamtamasyz etý, bıznesti sertıfıkattaý jáne farmasevtıka salalarynda qyzmet atqaratyn Altice, ISQ, PHC Software, Jaba Recordati, TechnoEdif, Bandora jáne Shift Consulting sekildi kompanııalardyń basshylary Qazaqstandaǵy qarjy tehnologııalary ekojúıesiniń serpindi damýyna shynaıy qyzyǵýshylyq tanytty. Astana Hub jáne «Astana» Halyqaralyq qarjy ortalyǵymen yntymaqtastyq ornatý týraly ýaǵdalastyqqa qol jetkizildi. Oǵan qosa Taguspark-tegi birqatar kompanııa ózara tıimdi jobalardy iske asyrý maqsatynda baılanys ornatý jáne perspektıvaly áriptester izdeý úshin Qazaqstanǵa kelýge nıet bildirdi.
