Qazir elimizde maman daıarlaıtyn úsh áskerı ınstıtýt bar. Olarǵa qujat tapsyrý úshin azamattar turǵylyqty jeri boıynsha 30 sáýirge deıin jergilikti áskerı basqarý organyna ótinish jazýy kerek.
Keıin densaýlyǵy jaramdy, UBT-nyń 5 páninen keminde 50 ball jınaǵandar (onyń ishinde negizgi pánderdiń birinen keminde 7 ball jáne qalǵan pánderdiń árqaısysynan keminde 4 ball) áskerı ınstıtýtqa 15-20 shilde aralyǵynda qujat tapsyrady. Azamattardy oqý oryndaryna qabyldaý arnaıy tártip boıynsha iske asady. Ashyp aıtsaq, talapkerler psıhologııalyq, medısınalyq tekseris pen dene shynyqtyrý daıyndyǵynan jáne konkýrstyq irikteýden ótýge tıis. Al qabyldanǵan jastar áskerı ınstıtýttardyń aýmaǵynda ornalastyrylyp, tamaqpen tolyq qamtamasyz etiledi.
– Talapkerge ár kezeńnen ótýge bir ret ruqsat etiledi. Aldyńǵy kezeńnen ótpegen jas kelesi kezeńge jiberilmeıdi. Konkýrstyq irikteýmen qabyldaý komıssııasy aınalysady jáne oqýǵa túsýshilerdiń eń joǵarydan eń tómenge deıingi baldarynyń reıtıngin jasaıdy. Reıtıng áskerı ınstıtýttyń qabyldaý komıssııasynyń hattamasynda resimdeledi. Komıssııanyń sheshimi 6 tamyz saǵat 10.00-ge deıin áskerı ınstıtýttyń ınternet resýrstarynda jarııalanady. Qorǵanys mınıstrligi áskerı oqý oryndarynyń negizgi mindetteriniń biri kásibı daǵdylary kóshbasshylyq qasıetteri bar, tereń bilimdi qarýly kúres pen jańa tehnologııalardyń ózgermeli talaptaryna beıimdele alatyn mamandardy daıyndaýdy maqsat etedi, – dedi J.Ahmetov.
Buǵan qosa baspasóz máslıhatynda Qorǵanys mınıstrliginiń qaramaǵyndaǵy eki áskerı kolledjge túsý sharttary da aıtyldy. Spıkerdiń sózinshe, Shýche qalasyndaǵy Sh.Ýálıhanov atyndaǵy jáne Astana qalasyndaǵy S.Nurmaǵambetov atyndaǵy áskerı kolledjderine azamattardy qabyldaý 1-20 tamyz aralyǵynda ótkiziledi.
– Kolledjge qabyldanǵan jyly 17 jasqa tolǵan, biraq 22 jastan aspaǵan azamattar men 24 jasqa deıin boryshyn ótegen jáne ótep jatqan áskerı qyzmetkerler tapsyra alady. Áskerı qyzmetin atqaryp júrgen áskerı qyzmetshiler 25 jasqa tolǵanǵa deıin shart jasaıdy. S.Nurmaǵambetov atyndaǵy áskerı kolledjde «Áskerı istegi avtomattandyrý jáne ınfokommýnıkasııalyq tehnologııalar», «Qarý-jaraq pen áskerı tehnıkaǵa qyzmet kórsetý», «Áskerı istegi kishi býyn menedjmenti» – osy úsh mamandyq boıynsha 2 jyl 10 aı oqý merzimimen negizgi orta bilim negizinde tehnıkalyq jáne kásiptik bilim berý baǵdarlamasy júzege asyrylady. Kolledj jetkinshekterdi oqý ornynyń 9-synybyn qabyldaý jyly bitirgen, negizgi orta bilimdi aıaqtaǵany týraly attestat alǵan, jasy 15-ten kishi emes, biraq 16 jastan asqan Qazaqstan Respýblıkasynyń azamattaryn qabyldaıdy, – dedi ol.
Sondaı-aq «Jas ulan» respýblıkalyq mektepterine qabyldaý 1-20 tamyz aralyǵynda júrgizilmekshi. Bul qatarǵa iligý úshin jasóspirimniń jasy 15-ten kishi bolmaýy kerek. Oǵan qosa 9-synypty aıaqtaǵany jóninde kýáligi bolýy shart. Densaýlyǵy tolyq jaramdy úmitker qujattaryn tamyzdyń birinen besine deıingi ýaqytta ótkizýge tıis. Qabyldaý kezeńinde negizgi orta bilim baǵdarlamasymen matematıka jáne oqý tilinen test tapsyrady.
Jalpy mektepte oqý merzimi – 2 jyl. Munda órender ınternat júıesi boıynsha tárbıelenýshilerdiń jiti baqylaýynda bolady. Ári belgilengen normalarǵa sáıkes shyǵyn bıýdjet qarajatynan óteledi.
Al Ulttyq qorǵanys ýnıversıteti tórt mamandyq boıynsha doktorantýra jáne basqarýdyń jedel-taktıkalyq, strategııalyq jáne jedel-strategııalyq deńgeılerindegi magıstratýra baǵdarlamalaryn oqytady. Oǵan daıyndyq Qarýly Kúshter túrleriniń negizgi mamandyqtaryn qamtıtyn úsh áskerı ınstıtýtta júzege asyrylady.
– Almaty qalasyndaǵy Qurlyq áskerleriniń Áskerı ınstıtýty komandalyq mamandyqtar boıynsha kadrlar daıarlaýdyń júıe quraýshy joǵary oqý orny bolyp sanalady. Instıtýt 6 mamandyq jáne 14 biliktilik boıynsha ofıserlik kadrlar daıarlaıdy. Al Aqtóbe qalasynda ornalasqan Keńes odaǵynyń eki márte batyry Talǵat Bıgeldınov atyndaǵy Áýe qorǵanysy kúshteriniń Áskerı ınstıtýty – ÁK Áýe qorǵanysy kúshteri, IIM avıasııasy jáne QR UQK Shekara qyzmeti úshin ushý jáne ınjenerlik-tehnıkalyq quramdy daıarlaý ortalyǵy. Instıtýt 5 mamandyq jáne 11 biliktilik boıynsha ofıserlik kadrlar daıarlaıdy. Almaty qalasyndaǵy Radıoelektronıka jáne baılanys áskerı-ınjenerlik ınstıtýty Áýe qorǵanysy, baılanys, avtomattandyrylǵan basqarý júıeleri, aqparatty óńdeý jáne qaýipsizdik mamandaryn daıarlaý ortalyǵy bolyp tabylady. Instıtýt 6 mamandyq jáne 9 biliktilik boıynsha ofıserlerdi daıarlaıdy, – dedi general-maıor Jumabek Ahmetov.
Budan basqa, Qarýly Kúshterdiń qajettilikterin eskere otyryp, Qorǵanys mınıstrligi ushý, Teńiz, Qurlyq, ınjenerlik, medısınalyq jáne gýmanıtarlyq mamandyqtar boıynsha tıisti deńgeıdegi bilim berý baǵdarlamalary boıynsha shetelde áskerı kadrlar daıarlaýdy iske asyrady.
Aıta keterligi, áskerı joǵary oqý oryndaryn tańdaýdyń óz artyqshylyqtary da bar. Máselen, jastar tegin bilim alady jáne qajetti qural-jabdyqtarmen qamtamasyz etiledi. Buǵan qosa azyq-túlik, demalys ýaqytynda jylyna eki ret jol júrýge múmkindik beriledi. Eń bastysy, túlekteriniń 100 paıyzy jumysqa ornalastyrylady. Bastapqy ofıserlik laýazymdarda áskerı qyzmet ótkerýdi jalǵastyrýǵa kepildik beriledi. Ártúrli baǵdarlama boıynsha turǵyn úı alý da qarastyrylǵan.
