Kásiporyn 2021 jyly «Poultry-Agro» JShS broılerlik qus fabrıkasynyń ınvestısııalyq jobasyn qolǵa alyp, jumysy toqtap turǵan «Komsomol qus fabrıkasyn» qaıta jańǵyrtýǵa kiristi. Bastapqy kezeńde buǵan 5,8 mlrd teńge ınvestısııa salǵan kásiporyn búginde jylyna 7,5 myń tonna broıler etin óndirip otyr. О́ndiris oshaǵy 283 adamdy turaqty jumyspen qamtamasyz etedi. Fabrıkadan shyǵyp jatqan qus eti búginde úlken suranysqa ıe.
– «Poultry-Agro» seriktestigin eki baǵytta damytýdy kózdep otyrmyz. Birinshiden, óndiristik qýatty jylyna 12,5 myń tonnaǵa deıin arttyrý josparda bar. Odan keıin dándi jáne maıly daqyldardy ósirý úshin ózimizge tıesili egis alqabyn 10 myń gektarǵa deıin ulǵaıtýdy josparlap qoıdyq. Bul kásiporyndy jemshóp bazasymen qamtamasyz etýge múmkindik beredi. Reseı Federasııasynyń birqatar oblysyndaǵy qolaısyz epızootııalyq jaǵdaıǵa jáne shekaranyń jabylýyna baılanysty mekıenderdi tirideı ákelý, qus ónimderin tasymaldaý múmkin emes. Sondyqtan qazirgi ýaqytta «Poultry-Agro» JShS jáne basqa da qus fabrıkalaryn balapanmen qamtamasyz etý máselesi ózekti bolyp tur, – deıdi «Jas-qanat 2006» JShS Bas dırektory Qaırat Maıshev.
Kásiporyn basshysynyń aıtýynsha, «Poultry-Agro» seriktestigi oblys turǵyndaryn shójemen qamtamasyz etý úshin osy saladaǵy ózge kásiporyndarmen birlesip, Qarabalyq aýdanynda ınkýbator salýdy josparlap otyr. Quny 2,2 mlrd teńge bolatyn joba júzege asyrylsa, jylyna ınkýbatordan 8 mln balapan basyp shyǵarýǵa bolady. Investısııalyq joba óńirdiń áleýmettik-ekonomıkalyq damýyna da oń áserin tıgizbek. Máselen, jańa ınkýbator iske qosylsa, elýden asa jańa jumys orny paıda bolady. Munyń syrtynda jergilikti bıýdjetke jylyna shamamen 250 mln teńge salyq tólemderi túsedi. О́ńirdiń iskerlik belsendiligi artady ári «Poultry-Agro» JShS-in broıler balapandarymen qamtamasyz etip otyrady.
«Jas-qanat 2006» JShS aldaǵy ýaqytta jumyrtqa untaǵyn shyǵarýdy da kózdep otyr. Bul ónimdi uzaq saqtaýǵa bolady. Tasymaldaýǵa yńǵaıly. Jańa óndiris jumyrtqaǵa suranys tómendegen jaǵdaıda kásiporynnyń shyǵyndaryn azaıtýǵa múmkindik berip, eksporttyq áleýetin arttyrýǵa septigin tıgizedi.
Qus fabrıkasy qolǵa almaq taǵy bir tyń joba – keleshekte taýyqtyń kóńin qaıta óńdeý óndirisin jolǵa qoıý. Kásiporyn basshysynyń aıtýynsha, qoqysty qordalaý (kompostaý) úderisin jedeldetetin jańa bıologııalyq ónimderdi qoldana otyryp, qus kóńin organıkalyq tyńaıtqyshqa aınaldyrý topyraqtyń qunary men ónimdiligin 35-40 paıyzǵa arttyrady eken. Sondyqtan qus fabrıkasy keleshekte qus sharýashylyǵy qaldyqtaryn qaıta óńdeýge arnalǵan bıogaz qondyrǵysyn salýdy josparlap otyr. Kásiporyn óndiristik qaldyqty qaıta óńdep, odan elektr energııasyn alýǵa múddeli. Bul joba qaldyqtardy kádege jaratý, sondaı-aq «jasyl tehnologııany» damytý turǵysynan mańyzdy.
Búginde fabrıkada jumyrtqa óndirý kólemi 35 ese ósken, qustyń uıasy 14 ese, ıaǵnı 10 myńnan 1,4 mln-ǵa deıin ulǵaıǵan. Al et óndirisi 15 ese, jumys oryndarynyń sany 5 esege deıin artqan. Qus fabrıkasy ónimderiniń 50 paıyzy syrtqa eksporttalady.
Qostanaı oblysy
