Kollajdy jasaǵan Záýresh SMAǴUL, «EQ»
Spıker alǵa tartqan málimetter boıynsha, jasy kelip zeınetke shyqqan azamattar memleket tarapynan jolǵa qoıylǵan júıeli qyzmetterdi paıdalana alady. Atap aıtqanda, elorda zeınetkerleriniń jylyna bir ret Shýchınsk-Býrabaı kýrorttyq aýmaǵynda, Qatarkól kóliniń jaǵasynda ornalasqan Qarttar men múgedekterge jáne múgedek balalarǵa arnalǵan ońaltý ortalyǵynda demalýyna ári emdelýine jan-jaqty jaǵdaı jasalǵan. Jasy boıynsha zeınetkerler joldama qunynyń 25%-yn jáne eń tómen mólsherdegi zeınetaqy alatyndar 18%-yn ǵana tóleýge bolady. Al Uly Otan soǵysynyń ardagerlerine, olarǵa teńestirilgen tulǵalarǵa tegin.
– Stomatologııalyq protezdeý qyzmeti eki jylda bir ret kórsetiledi. Bıyl Astana qalasynda tis protezdeýge jáne aýyz qýysynyń protezine deıingi sanıtarlyq tazalaýǵa 3 myń oryn bólindi. Qazirgi ýaqytta tis protezdeý jáne sanıtarlyq qyzmet kórsetý boıynsha memlekettik satyp alý konkýrsy jarııalandy. Odan keıin memlekettik satyp alý ótkiziledi. Nátıjesinde, qyzmet kórsetýshimen, stomatologııamen shart jasalady. Odan ári BAQ arqyly qala turǵyndary eki jylda bir ret beriletin tis protezdeýine jazylý ýaqyty men orny týraly qulaqtandyrylady, dedi A.Talasova.
Sonymen qatar atalǵan basqarma ókiliniń aıtýynsha, Qarttar kúnine oraı (1 qazanda) 2,5 AEK kóleminde bir rettik aqshalaı tólemder beriledi. Buǵan qosa qatty otyndy satyp alý boıynsha áleýmettik kómek jan basyna shaqqandaǵy tabysy tórt eń tómen kúnkóris deńgeıinen aspaıtyn, otbasy múshelerinde basqa turǵyn úıi bolmaǵan jaǵdaıda peshpen jylytatyn jeke turǵyn úıde turatyn, onyń jeke menshik ıesi (jalǵa alýshysy) nemese ıesiniń otbasy músheleri bolyp keletin zeınetkerlerge, múgedektigi bar adamdarǵa, múgedektigi bar balalarǵa, áleýmettik máni bar aýrýlarǵa shaldyqqandarǵa, kópbalaly analarǵa jáne kópbalaly otbasylarǵa, jetim balalarǵa, ata-anasynyń qamqorlyǵynsyz qalǵan balalarǵa, balalar úıleriniń túlekterine kórsetiledi. О́temaqy 16 AEK kóleminde jylý merzimine tólenedi. Sondaı-aq turǵyn úıdi gazdandyrýǵa beriletin birjolǵy áleýmettik kómek te osyndaı. Gaz qazandyǵyn salý jáne montajdaý boıynsha shyǵyndardy óteý – 130 AEK-ten aspaıtyn somada.
– О́mirlik qıyn jaǵdaıǵa tap bolǵan adamdarǵa bir rettik áleýmettik kómek múgedektigi bar tulǵalarǵa kórsetiledi. Al dári-dármek satyp alý jáne medısınalyq qyzmetterdi alý shyǵyndaryn jabýǵa arnalǵan tólem jylyna bir ret aqshalaı 13 AEK kóleminde beriledi. Tabıǵı zilzala nemese órt saldarynan zardap shekken azamattarǵa áleýmettik kómek aqshalaı tólem túrinde myna kólemde usynylady: jalǵyz turǵyn úıge eleýli zııan keltirilgen, búlingen, joıylǵan jaǵdaıda otbasyna – 400 AEK; otbasy músheleri qaıtys bolǵanda, qaza bolǵanda – 150 AEK. Sondaı-aq elordada turaqty turatyn jáne turǵyn úıdiń menshik ıeleri bolyp sanalatyn az qamtylǵan otbasylarǵa, kommýnaldyq tóleýge jumsalatyn shyǵyndardyń jıyntyq tabysynan 5% asatyn otbasyna beriletin «turǵyn úı kómegin taǵaıyndaý» memlekettik qyzmeti kórsetiledi. Bul tólemniń ortasha kólemi – aıyna 25 myń teńgege deıin, dedi A.Talasova.
Sonymen qatar ataýly áleýmettik kómek jan basyna shaqqandaǵy ortasha tabysy kedeılik sheginen aspaıtyn adamǵa, otbasyna ortasha tabys pen kedeılik shegi arasyndaǵy aıyrma retinde shartsyz nemese shartty aqshalaı kómek túrinde beriledi. Bul rette Astana qalasynda 2023 jyldyń 1-toqsanynda kedeıshilik shegi 35 265 teńgeni quraǵanyn aıta ketken jón. Buǵan qosa elordada zeınetkerler úshin jolaýshylar kóligi marshrýttarynda tegin júrý qarastyrylǵan.
