«Respublica» basshylary men Májilis depýtattyǵyna kandıdattar jáne basqa da partııa músheleri qatysqan alqaly jıyn ótti. Jıynǵa barlyq aımaqtyq shtabtardyń basshylary men qyzmetkerleri beınebaılanys arqyly qosyldy. Partııa tóraǵasy Aıdarbek Qojanazarov qatysýshylarǵa sáttilik tiledi.
– Kópten kútken sát te kelip jetti. Saılaýdyń úgit-nasıhat naýqany bastaldy. Endi biz barlyq kúshimizdi jumyldyryp, sapaly jumys isteımiz. Barlyǵyńyzdyń qanshalyqty uzaq jáne aýyr jumys istegenderińizdi bilemin. Qatelikter de boldy, jeńisterimiz de az emes. Eń bastysy, biz partııany qurǵan kúnnen bastap, osy mańyzdy kezeńge abyroımen jettik. Búginnen bastap respýblıkalyq, oblystyq shtabtardyń esigi ár azamatqa aıqara ashyq. Biz halyqty ózimizge daýys berýge shaqyra bastadyq. Búginnen bastap resmı saıtymyzda jarııalanǵan saılaýaldy baǵdarlamamyzben tanysyp, neni jaqtaıtynymyzdy, qandaı ıdeıalardy nasıhattap, qoǵamdyq talqylaýǵa qandaı bastamany shyǵarǵymyz keletinin bile alasyzdar, – dedi partııa lıderi.
Jıynnan soń partııa lıderi Aıdarbek Qojanazarov, teń tóraǵa Syrymbek Taý jáne basqa da jetekshiler alǵashqy úgit-nasıhat plakattaryn ilý úshin elimizdiń ár qalasyndaǵy kóshelerge shyqty. Osylaısha, úgit-nasıhat toby elimizdiń barlyq aımaǵynda iske qosyldy. Qyzmetkerler men eriktiler bannerler ilip, plakattar japsyryp, azamattarǵa úgit paraqshalaryn taratýdy bastap ketti.
«Respublica» – memleket qyzmetiniń túrli salalaryn qalpyna keltirýge umtylatyn belsendi azamattardy biriktirgen partııa ekenin málimdegen bolatyn. Oǵan kásipkerler men qoǵam qaıratkerleri tartylǵan. «Basty maqsatymyz – árbir azamat saıası, áleýmettik jáne ekonomıkalyq ózgeristerge óziniń atsalysyp jatqanyn sezinýi úshin el saıasatyna yqpal etý tetikterin jasaý. Uranymyz – «Jańa adamdar – Jańa qadamdar» deıdi partııa ókilderi. Partııanyń qurylǵany týraly 2022 jyldyń tamyzynda jarııalanǵan bolatyn. 2023 jyldyń 18 qańtarynda «Respublica» partııasy tirkeý qujattaryn qabyldady.
