«Baıtaq» jasyldar partııasynyń óńirlik shtaby Túrkistan oblysynyń Saıram jáne Shymkent qalalarynda Saıram – Shymkent – Túrkistan baǵytymen avtobýs týryn bastady. Atalǵan is-sharaǵa Túrkistan oblysy men Shymkent qalasy shtabynyń músheleri, Túrkistan oblysy men Shymkent qalasynan máslıhatqa kandıdattar retinde tirkelgen azamattar qatysty. Aksııa iri qalalar men óńirlerdiń ekologııalyq máselelerine, aýanyń, sý qoımalarynyń jáne landshafttyń lastanýynyń joǵary deńgeıine nazar aýdarýǵa baǵyttalǵan. Maqsaty – taza qorshaǵan ortany qorǵaýǵa, tabıǵatqa uqypty qaraýǵa, taza energııa men ónerkásip qurýǵa jáne adamdardyń densaýlyǵyn saqtaýǵa shaqyrý. Týr barysynda aksııaǵa qatysýshylar jergilikti turǵyndardyń usynystary men shaǵymdaryn tyńdady.
Budan bólek, «Baıtaq» jasyldar partııasy «Taza ómir» atty bir aptalyq ekologııalyq marafonyn bastady. Is-sharaǵa aýasy joǵary lastanǵan qalalardyń turǵyndary, ekobelsendiler men partııa jaqtastary qatysty. Marafon qatysýshylary gaztumsha kıip alyp, Astana, Almaty jáne Temirtaý saıabaqtary arqyly júgirdi. Aksııa ónerkásiptik kásiporyndardan atmosferalyq aýany lastaýshy zattardyń shyǵarylýyn azaıtýdy maqsat etip otyr. Sebebi iri ónerkásiptik qalalarda turatyn adamdar densaýlyqqa áser etetin zııandy jáne ýly zattarǵa toly aýamen tynys alýǵa májbúr.
– Biz jeke sektordyń kómir otynynan tabıǵı gazǵa kóshýin jáne jańartylatyn energııa kózderin paıdalanýdy kózdeımiz. Búgin biz qoǵamymyzdy tunshyqtyryp jatqan máselelerdi halyqqa jetkizý úshin gaztumshamyzdy sheshtik. Bul aksııa – taza tynys alý, taza saılaý jáne taza saıasat úmitiniń sımvoly. Las aýadan zardap shegetin barlyq aımaqty marafonymyzǵa qatysýǵa shaqyramyz, – dedi «Baıtaq» jasyldar partııasynyń kóshbasshysy Azamathan Ámirtaı.
Almatydaǵy Tuńǵysh Prezıdent saıabaǵynda estafetany partııalyq tizim boıynsha Májilis depýtattyǵyna kandıdat Arman Qashqynbekov pen Almaty qalalyq shtabynyń músheleri qabyldady.
