Bul týraly jýrnalıst Ǵalymjan Qaramanuly áleýmettik jelidegi paraqshasynda habarlady.
«Káýsar qyzym Brıtanııada qazaq tilin nasıhattap júr. Qazaqstannyń Ulybrıtanııadaǵy elshiligine Dımash Qudaıbergenniń jankúıerleri jınalyp, óte mazmundy kesh ótti», dep jazdy ol.
Kezdesý barysynda jankúıerler Dımashtyń ánderin oryndaǵan. Olarǵa arnaıy dastarhan jaıylyp, qazaqtyń ulttyq taǵamdary usynyldy. Tyńdarmandar qaıyrymdylyq sharalaryna 1 mıllıon teńge aýdarǵanyn da atap ótý kerek.
«Dıerstar Qazaqstanǵa qaıyrymdylyqqa 1 mln teńge aýdardy. Bul aqshaǵa balalar úıiniń tárbıelenýshileri mýzykalyq aspaptar satyp alady», dedi Ǵalymjan Qaramanuly.
Káýsar «Balapan» telearnasynda balalarǵa aǵylshyn tilin úıretedi, al kezdesýde Dımashtyń tyńdarmandaryna qazaq tilin úıretti. Jankúıerler oǵan súısinip, jyly lebizderin bildirdi.
«Káýsar sondaı súıkimdi jáne aǵylshyn tilin jaqsy meńgergen. Qazaqshasy da ǵajap!», dedi tyńdarmandardyń biri Maıkl.
