«Medısına jáne farmasevtıka qyzmetkerleriniń eńbegin quqyqtyq retteý tetigin ázirleý» taqyryby boıynsha ǵylymı zertteýdi EUÝ ǵalymdary 2020 jyldan 2022 jylǵa deıin memlekettik granttyq qarjylandyrý sheńberinde júrgizdi. Avtorlar ujymy eńbeginiń nátıjesinde monografııa alǵash ret jaryq kórdi jáne zań jobasy ázirlendi.
Ǵalymdar ujym medısına jáne farmasevtıka qyzmetkerleriniń eńbek máseleleri boıynsha quqyqty qoldaný jáne sot praktıkasyna taldaý júrgizdi. Olar máseleni egjeı-tegjeıli zerdeleý maqsatynda Qazaqstannyń alty óńirinde bolyp, jergilikti densaýlyq saqtaý uıymdarynyń qyzmetkerleri arasynda 1000 astam saýalnama men suhbat júrgizdi. Zertteý nátıjeleri kórsetkendeı, medısınalyq jáne farmasevtıkalyq qyzmetkerlerdiń eńbek qatynastary zańnamada zańdy túrde rettelmegen. Zertteý zań ǵylymdarynyń doktory, EUÝ professory Eńlik Nurǵalıevanyń jetekshiligimen júrgizildi.
«Osy taqyryp boıynsha mundaı zertteý Qazaqstanda alǵash ret júrgizildi. Onyń ózektiligi - medısına jáne farmasevtıka qyzmetkerleriniń jumysyn quqyqtyq retteý qajettiligi. Sebebi osy sanattaǵy qyzmetkerler jumysynyń kúrdeliligi, adam ómiriniń joǵary deńgeıin qamtamasyz etýmen qatar densaýlyqqa tónetin qaýiptermen baılanysty. Osylaısha ulttyq zańnamany damytýdyń barlyq kezeńinde medısına jáne farmasevtıka qyzmetkerleriniń eńbegin quqyqtyq retteýdi odan ári jetildirý maqsatynda zertteý taqyryby boıynsha teorııalyq jáne praktıkalyq materıaldarǵa keshendi taldaý jasaldy. Biz bastapqy aqparatty jınaý maqsatynda birqatar aımaqtarda dalalyq zertteý júrgizdik. Medısına jáne farmasevtıka qyzmetkerleriniń eńbek jaǵdaılary týraly jedel derekterge suhbat jáne saýalnama arqyly qol jetkizdik», dedi EUÝ professory.
Ǵalymdar halyqaralyq tájirıbeni keńinen zerttedi. Onyń ishinde monografııada EYDU-nyń jekelegen memleketterindegi quqyqtyq retteý joldary keltirilgen. Mysaly, Ulybrıtanııada shamamen 1,44 mıllıon mamandy qamtıtyn 32 medısınalyq jáne farmasevtıkalyq kásipti retteýge toǵyz organ jaýap beredi. Bul rette kásibı retteýmen qatar memlekettik retteý de qoldanylady.
«Qazaqstan Respýblıkasynyń keıbir zańnamalyq aktilerine Medısınalyq jáne farmasevtıkalyq qyzmetkerlerdiń eńbegin retteý máseleleri boıynsha ózgerister men tolyqtyrýlar engizý týraly» QR zań jobasy jáne tujyrymdamasy Parlament Májilisine, Ádilet, Eńbek jáne halyqty áleýmettik qorǵaý, densaýlyq saqtaý mınıstrligine jiberilgen. Densaýlyq saqtaý mınıstrliginiń jaýap hatynda habarlaǵandaı, usynylǵan túzetýler QR Parlamenti Májilisiniń «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn talqylaý jónindegi jumys tobynyń aǵymdaǵy otyrystary barysynda aıtylatyn bolady. Biz EAEO memleketterindegi medısına jáne farmasevtıka qyzmetkerleriniń eńbegi týraly zańnamany taldaǵanymyzdy da atap ótkim keledi. Belgili bolǵandaı, EAEO-nyń barlyq memleketterinde medısınalyq jáne farmasevtıkalyq qyzmetkerlerdiń eńbegin arnaıy retteý joq», dep atap ótti ǵalym.
Ǵalymdar júrgizilgen zertteý nátıjeleri medısına jáne farmasevtıka qyzmetkerleriniń eńbegin quqyqtyq retteý máselelerinde zańnama men quqyq qoldaný praktıkasyn odan ári jetildirýge yqpal etedi dep úmittenedi.
