Infografıkany jasaǵan Amangeldi Qııas, «EQ»
Memleket basshysy Qasym-Jomart Toqaev byltyr 1 qyrkúıektegi Joldaýynda: «Jalpy, adam áleýetin damytý – mańyzdy máseleniń biri. Osy oraıda, shetelden daryndy jandardy elge tartý qajet. Ásirese shyǵarmashylyq jáne kásipkerlik salada jetistikke jetken azamattardy shaqyrý kerek. Men tıimdi kóshi-qon saıasaty týraly aıtyp otyrmyn. Suranysqa ıe bolyp otyrǵan jáne joǵary bilikti mamandardyń tapshylyǵyn azaıtý qajet. Ǵylym, densaýlyq saqtaý, óndiris, IT-salalarynyń bilikti mamandaryna jeńildik jasalady. Memleket olarǵa elimizde turaqty turý úshin vıza beredi. Shetel kásipkerleri on jylǵa vıza resimdep, Qazaqstanda turýǵa múmkindik alady. Biraq olar ekonomıkamyzǵa 300 myń dollardan asa ınvestısııa salýy qajet», dep atap ótti.
Prezıdenttiń osy tapsyrmasyn iske asyrý maqsatynda Eńbek jáne halyqty áleýmettik qorǵaý mınıstrligi ǵylym, densaýlyq saqtaý, ónerkásip jáne IT-salalarynda óte qajet kásipterge mamandanǵan shetel azamattarynyń Qazaqstanda turýǵa yqtııarhat alýyna múmkindik beretin mamandyqtar tizimin bekitti.
2022 jyldyń 26 jeltoqsanynda «Qazaqstan Respýblıkasynyń keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zańy qabyldanyp, bul tıisti vedomstvoǵa sheteldikterdiń Qazaqstanda turaqty turýǵa ruqsat alýy úshin qajetti kásipterdiń tizbesin jáne ony qalyptastyrý tártibin bekitý jónindegi jańa fýnksııa berdi.
Zańdy iske asyrý maqsatynda mınıstrlik bıyl 28 aqpannan bastap qoldanysqa engiziletin «Sheteldikterdiń Qazaqstan Respýblıkasynda turaqty turýǵa ruqsat alýy úshin suranysqa ıe kásipter tizbesin jáne ony qalyptastyrý qaǵıdalaryn bekitý týraly» buıryqtyń jobasyn ázirledi.
Suranysqa ıe kásipteri bar sheteldikter ózderiniń tólem qabilettiligin rastamaı, ishki ister organdarynda ońaılatylǵan tártippen turýǵa ruqsat resimdeı alady. Turýǵa ruqsat 10 jylǵa nemese sheteldik pasporttyń qoldanylý merzimine sáıkes beriledi.
Al sheteldikter paıdasyn tıgizetin mamandyqtardyń tizimine kelsek, bul densaýlyq saqtaý, aqparattyq-kommýnıkasııalyq tehnologııalar, ınjenerııa, ǵylym jáne basqa da salalarda suranysqa ıe 21 kásipti qamtydy.
