Jer betindegi kúrdeli ekologııalyq ahýaldyń biri – qaldyqtardyń jaıy. Tehnologııalyq úderistiń nátıjesinde kóp nárse qoljetimdi. Solardyń ishinde júzdegen jyldan astam ýaqyt saqtalatyn polıetılen paketteri, plastıkalyq bótelkeler bar. Dúnıejúzilik banktiń esebinshe, 2050 jylǵa qaraı álemdegi turmystyq qaldyqtyń kólemi 3,4 mlrd tonnaǵa jetedi. Bul keleshekte Jer planetasynyń úlken qoqys polıgonyna aınalatynyn bildiredi. Birqatar damýshy elde qaldyqty bólip jınaý mádenıeti áli kúnge jolǵa qoıylmaǵan. О́kinishke qaraı, bul qatarda Qazaqstan da bar.
Stýdenttermen kezdesý barysynda partııa múshesi jáne ekobelsendi Mıras Abbasov sanaly tutynýǵa kóshýdiń mańyzdylyǵyn atap ótti. «Qazirgi kúni álemdi marketolog mamandar bılep, óz taýarlaryn usynady. Al biz óz kezegimizde naqtylaı zattardyń qanshalyqty qajeti bar ekenin sanamyzdan ótkizýimiz kerek. Mysaly, bir djınsy shalbar shyǵarý segiz myń lıtr sýdy qajet etedi jáne oǵan basqa da resýrstar qajet. Sondyqtan ár zatty almas buryn oı tarazysynan ótkizý kerek», dedi ol.
Astana qalasynda ázirge bir ǵana qoqys óńdeıtin zaýyt bar. Ekinshisi ázirge josparda ǵana tur. «Qala kóshelerinde ushyp júrgen paketter men shashylyp jatqan plastıkalyq bótelkelerdi retteý úshin «EkoHakaton» qatysýshylary jabyq qoqys jáshigin ornatýdy usyndy. Kún saıyn Astanada 50 myń polıetılen ónimi qoqysqa jóneltiledi», dedi M.Abbasov.
Stýdentterdi mazalaıtyn ekologııalyq máseleler – Esil ózeniniń lastanýy men Taldykól taǵdyry. Sondaı-aq jastar qala turǵyndarynyń ekobelsendiligin arttyrý maqsatynda senbilikterdiń formatyn ózgertip, ekokvest, marafon sııaqty qyzyqty is-sharalardy ótkizýdi usyndy.
«Baıtaq» partııasynyń jasyl ekonomıka boıynsha hatshysy Shyńǵys Lepsibaev partııanyń Astana aýmaǵynda ǵana emes Qazaqstan boıynsha ekologııalyq jaǵdaıdy jaqsartýdyń josparymen bólisti. Baıtaqtar kógaldandyrý men turǵyn úı-kommýnaldyq sharýashylyǵy salasynda jańa tásilderdi qoldaıdy. Bar bolǵany tórt jyl kóleminde partııa músheleri halyqaralyq standartqa sáıkes keletin qala kórinisin kógaldandyrýdy josparlap otyr.
