Úkimet basshysy qaladaǵy 1981 jyldan beri jumys istep turǵan «Basqýat» qazandyǵyna bardy. Qýaty shamamen 200 Gkal/saǵat bolatyn qazandyq búginde 500-den astam kóp páterli jáne 1 000 jeke turǵyn úıdi, 20 mektepti, 25 balabaqshany, 10 aýrýhanany jáne 90 ákimshilik ǵımaratty jylýmen qamtamasyz etip otyr. Sonymen qatar Taldyqorǵandaǵy qurylys jumystarynyń qarqyny men jyl saıynǵy júktemeniń ulǵaıyp kele jatqanyn eskere otyryp, qazandyq qýatyn saǵatyna 300 Gkal-ǵa deıin arttyrý jáne obektini gazǵa aýystyryp, jańǵyrtý josparlanyp otyr.
Álıhan Smaıylov qazandyqty jańǵyrtý tutynýshylarǵa kórsetiletin qyzmetterdiń sapasyn arttyryp, qalanyń ekologııalyq ahýalyn jaqsartýǵa jáne jylý shyǵynyn tómendetýge múmkindik beretinin atap ótti.
«Qazandyqty gazǵa aýystyrýdyń mańyzy zor, bul ónimdilikti jaqsartyp, ekologııalyq máselelerdi sheshýge aıtarlyqtaı úles qosady. Oblys ákimdigi joba boıynsha jumysty jedeldetýi kerek. Úkimet óz tarapynan qajetti kómek kórsetedi», dedi Úkimet basshysy.
Odan keıin Premer-mınıstr kabeldik-ótkizgish ónimderdiń túrlerin shyǵaratyn «Taldyqorǵankabel» kásipornynyń jumysymen tanysty. Zaýyt óz ónimderin Qazaqstannyń barlyq óńirlerine, sondaı-aq Ázerbaıjan, Qytaı, Qyrǵyzstan, Polsha, Reseı, О́zbekstan jáne basqa da birqatar elderge shyǵaryp otyr.
Jalpy Jetisý oblysynda 514 ónerkásip kásiporny jumys isteıdi, onda 4 myńnan astam adam eńbek etedi. О́tken jyly óńirde 280 mlrd-tan astam teńgeniń óndiristik ónimderi shyǵaryldy, 17 jańa nysan paıdalanýǵa berildi. 2023 jyly ınvestısııalyq quny 24,4 mlrd teńgeni quraıtyn taǵy 8 jobany iske qosý josparlanǵan.
Úkimet basshysynyń aıtýynsha, energetıka, mashına jasaý kásiporyndarynda, sondaı-aq memleket qarajaty esebinen obektiler salý kezinde otandyq ónimdi paıdalanýdy yntalandyrý qajet. Osyǵan baılanysty Indýstrııa jáne ınfraqurylymdyq damý mınıstrligine normatıvtik-quqyqtyq aktilerge tıisti ózgerister engizý máselesin pysyqtaý tapsyryldy.
Taldyqorǵandaǵy shaǵyn aýdandardyń birinde Álıhan Smaıylov halyqtyń áleýmettik osal toptaryna jatatyn azamattar úshin salynǵan 60 páterlik turǵyn úıdi aralap kórdi. Úkimet basshysy 2022 jyldyń qorytyndysy boıynsha oblysta qurylys jumystarynyń kólemi 4%-dan astam óskenin atap ótti.
«Oblys ákimdigi osy qarqynmen belgilengen josparlardy tıimdi iske asyrýdy jalǵastyrýy qajet. Sonymen qatar qurylys júrip jatqan aýdandarǵa ınfraqurylymdy keshiktirmeı, der kezinde tartyp berý mańyzdy», dedi Premer-Mınıstr.
Sapar barysynda Úkimet basshysy Aqshatoǵan aýylyndaǵy jańa feldsherlik-akýsherlik pýnkttiń jumysymen tanysty. Onda bıylǵy qańtar aıynan bastap jergilikti turǵyndar medısınalyq kómek pen ekpelerdiń negizgi túrlerin ala alady. Aldaǵy úsh jylda óńirde taǵy 118 alǵashqy medısınalyq-sanıtarlyq kómek nysany, onyń ishinde «Aýyldyq densaýlyq saqtaýdy jańǵyrtý» ulttyq jobasy aıasynda 59 medısınalyq nysan ashý josparlanyp otyr.
