Osy kúnderi Talǵar aýdanynyń Qaınar aýyldyq okrýgine qarasty Jańalyq, Jalǵamys, Dáýlet aýyldary men Almatymen irgeles jatqan Besaǵash aýylynyń kóshelerine qar sýy jaıylyp, aýlalardy sý basqan jaǵdaılar tirkelgen. Kóshege jıylǵan sýdan jaıaý júrginshilerdiń júrip-turýy qıynǵa soǵyp, kólikterin aıdalada qaldyrýǵa májbúr bolǵan turǵyndar bul jaıttyń alǵashqy ret emes, jyl saıyn qaıtalanatynyn aıtyp, dabyl qaǵýda.
– Balalarymyzǵa janymyz ashıdy. Aıaqtary malmandaı sý bolyp keledi. Olar túgili ózimiz de árli-berli óte almaı qıyndyq kórýdemiz. Kóktem kelse kól bolatyn aýylymyzdyń bul qıyndyǵyna shydamaǵan keı turǵyndar esikterin jaýyp, páter jaǵalap ketedi, – deıdi Jańalyq aýylynyń turǵyny Ásııa Mamanova.
Dál osylaı batpaqqa batyp júrgen Jalǵamys, Nura aýyldyq okrýgine qarasty О́stemir aýylynyń turǵyndarynda da maza joq. Aýyl kóshelerindegi qar sýynan paıda bolǵan kólshikterden óte almaı, bala da, úlkender de qınalyp júr.
– Kóktem kelse, kórgen kúnimiz osy. Kúzdiń de jaýyn-shashynynda balalarymyz batpaqqa belshesinen batyp, sý bolyp júredi. Aıaqkıim shaq kelmeıdi. Kólikpen júrý de múmkin emes. Jańaqurylysty bylaı qoıǵanda ortalyq kóshelerdiń de kúıi osy bolyp tur. Aýyl joldary qashan jasalyp, qashan ýaıymnan, qıyndyqtan arylamyz? Aýyldyq ákimdikter ne bitirip otyr, bizge jany ashıtyn úkimet bar ma? dep kúıinedi Oral Aınabaev bastaǵan Jalǵamys aýylynyń bir top turǵyndary.
Jalǵamys aýyly turǵyndarynyń basym bóligi qonystanǵan jańaqurylystaǵy kóshelerge jyl saıyn tas-qum tóselgenmen, ony osyndaı jaýyn men qar sýy shaıyp ketedi. Byltyr Jalǵamys aýylynyń 4 shaqyrym jolyna balas tóselgen. Biraq odan keler qaıran joq.
Kúnniń kúrt jylýynan týyndaǵan tótenshe jaǵdaı Jambyl aýdanynyń turǵyndaryn da áýre-sarsańǵa salyp qoıdy.
– Qyzyl sýǵa qarsy áreket etip, bóget jasaǵannan qaıyr bolmaı tur. Taýdan aqqan qar sýy ózenge aınalyp, qora-qopsymyzdy, aýlamyzdy túgel basyp jatyr. Jerdiń tońy jibimegendikten mamandardyń jumysyna kedergi kóp, – deıdi Sarybaı bı aýylynyń turǵyny Aınur Sovethanqyzy.
Tótenshe jaǵdaılar bólimi men aýyldyq ákimdik mamandary, aýyl turǵyndary birlesip, Sarybaı bı aýylyndaǵy eki ýchaskede sý tasqynyna qarsy jumystar júrgizýde. Qazaqstan kóshesi boıynsha erigen sýdyń aldyn alý maqsatynda turǵyn úıdiń aýmaǵy 40 qapshyqty ınertti materıaldarmen nyǵaıtylǵan. Sondaı-aq sýdy burý úshin uzyndyǵy shamamen 50 metr bolatyn ýaqytsha aryq jelisi qazyldy.
Bul jumystarǵa jergilikti atqarýshy organdardyń 8 adam jáne 1 birlik tehnıkasy, №28237 áskerı bólimniń 3 qyzmetkeri jáne 3 birlik tehnıkasy, TJ departamentiniń 2 qyzmetkeri jáne 1 birlik tehnıkasy jumyldyrylǵany jaıly Almaty oblysy tótenshe jaǵdaılar departamentiniń baspasóz qyzmeti habarlady.
Sonymen qatar sońǵy málimetter boıynsha Talǵar aýdany Besaǵash aýyldyq okrýgindegi sý basqan aımaqtarda sýdy syrtqa aıdaý jumystary jalǵasýda.
О́ńirde 2022 jyly 34 qaýipti ýchaske anyqtalǵan. Oǵan jergilikti atqarý organdarynan qarajat bólinip, 7 ýchaske tolyqtaı joıylǵan. Qalǵan 27 qaýipti ýchaskede bıylǵy jyly qarajat qarastyrylsa, tıisti jumystar atqarylatyn bolady.
Ulbosyn Isabek,
jýrnalıst
Almaty oblysy
