Spıker Jetisaı jurtyna partııanyń saılaýaldy baǵdarlamasyn tanystyrdy. «Qazaqstannyń árbir azamatyna ǵasyrlar boıǵy babalarymyzdyń arman-muratyn júzege asyrýǵa múmkindik berý qajet. Bul úshin jer telimi keıingi urpaqqa ómir boıy paıdalaný quqyǵymen mura retinde qalýǵa tıis. Osy quqyq el azamattaryna ǵana berilýi kerek», dedi ol.
Kandıdat agrosalany damytýdaǵy memlekettiń is-qımyly kóńilden shyqpaıtynyn atap ótip, jyldar boıy zerttelip, negizi qalyptasqan kooperasııa júıesi álem boıynsha aýyl sharýashylyǵyn damytýdaǵy tabystyń basty qupııasy ekenin málimdedi.
«Kóptegen el aýyl sharýashylyǵy ónimderin jetkizýshilermen, qaıta óńdeý kásiporyndarymen, ýnıversıtettermen, zertteý ortalyqtarymen, kólik-logıstıka, ınjınırıng jáne konsaltıngtik kompanııalarmen, qarjy ınstıtýttary, ınvestorlarmen sharýashylyq tehnıkasyn birlesip paıdalaný boıynsha yntymaqtastyq ornatady. Nátıjesinde, bul iske basa mán bergen elderde agrosala erekshe qarqynmen damyp jatyr», dedi A.Asylbekov.
Budan keıin kandıdat ómir súrý sapasy nasharlaǵan jáne zardap shekken sanattaǵy otbasylardy qoldaý tıisti deńgeıde júrgizilmeıtinine toqtaldy.
– Memleket 4 jáne odan da kóp balasy bar kópbalaly otbasylarǵa tegin baspana berýi qajet. Sondaı-aq ıpotekany úsh balaǵa deıingi otbasylarǵa qoljetimdi etýi kerek. Mindetti sharttardan bastapqy jarnany alyp tastaýdy jáne tómendetilgen paıyzdyq mólsherlemelerdi (jyldyq 2-den 5%-ǵa deıin) belgileýdi usynamyz. Ekinshi baladan bastap 25%, al 4-shi bala týǵan kezden memleket esebinen ıpoteka engizýdi usynamyz», dedi partııa ókili.
Spıker dál osy kúni saryaǵashtyqtarmen de júzdesti. Munda A.Asylbekov jastar máselesi men qandastardyń jaǵdaıyn tilge tıek etti.
