«Kóne Taraz» - Aman Maldybaevtyń kúıi. Kúıshi bul týyndysyn jeltoqsan oqıǵasy kezinde jazǵan.
«Kúıiniń tarıhy 1986 jyldan bastaý alady. El tarıhyndaǵy aýyr oqıǵanyń biri jeltoqsan kóterilisi bolǵannan keıin kóńilim jabyrqap, elge qaıtqym kelip júrgen kez edi. Sol ýaqytta «Kóne Taraz saǵynyshy» degen kúı jazdym. Jalpy kúıdiń ózi jaryqqa tolǵanyp, tebirenip, saǵynǵan kezde shyǵady ǵoı. Sol ýaqytta ejelgi Tarazdy kóz aldyma elestetip, mań-mań basqan túıeler, qazaqtyń ǵanıbet zamany, jazıra dalasy, úlkendi syılap, kishige izet tanytyp, bir-birin rııasyz shynaıy qurmettep, jaz jaılaýy, qys qystaýy bolǵan keremet shaǵyn, Shahrıstanǵa kele jatqan kerýenderdi oılap, kóne zamannan bastaý alyp shyǵardym», deıdi ol.
Avtordyń aıtýynsha, kúıdiń ataýy keıin ózgergen.
«Bul jaqqa kelgennen keıin Jaqsylyq Sátibekov aǵamyz «Aman, sen qazir týǵan jerde júrgen joqsyń ba? Sondyqtan kúı ataýyndaǵy saǵynysh degen sózdi alyp tasta» dedi. Solaı aǵanyń aqylymen kúı «Kóne Taraz» dep atalyp ketti», deıdi Aman Maldybaev
Keıinnen bul kúı el arasynda tarap, tanyla bastady.
«1986 jyly shyqqanymen, men ol kúıdi tyǵyp tastadym. Ońashada ózim ǵana tartyp, notasyn jazyp, sandyqqa salyp qoıdym. Keıin bireýler taýyp alyp, oınaıdy ǵoı dep oıladym. Sóıtsem, eshkim izdemeıtin kórinedi. Elder kelip jatyr, ómirden ótip jatyr. Bireýdi bireý izdep jatqan eshkim joq. Qoı, kúıimdi nasıhattaıyn dep 1993 jyly kompozıtor Baǵlan Omarov ekeýimiz otyryp, estradalyq túrde dástúrli mýzyka qosyp jazdyq. Erteńinde birden stadıonda halyqtyń aldynda oınaýǵa kettim. Sodan beri sahnadan túspeı kele jatyr», deıdi kúıshi
