Pavlodar oblysynyń polıseıleri úıden ketip qalǵan 8 jastaǵy qyzdy ata-anasyna qaıtardy.
«27 aqpan kúni saǵat 21:20-da áriptesim Saýtov Baǵdatpen Pavlodar – Ýspenka avtojolyn patrýldedik. Jol boıynda jalǵyz júrgen qyzdy baıqadyq. Biz ony tynyshtandyryp, kólikke otyrǵyzdyq. Ol balanyń 8 jasta ekendigin, ata-anasymen birge Ýspen aýylynda turatynyn anyqtadyq. Jaǵdaıdy odan ári anyqtaý úshin kámeletke tolmaǵan bala Ýspen aýdanynyń polısııa bólimine jetkizildi», dedi Pavlodar oblysy PD patrýldik polısııa rotasy qyzmetiniń ınspektory Bolat Jumashev.
Ata-anasy qyzǵa úı tapsyrmasyn durys oryndamaǵany týraly eskertý jasaǵan. Osydan keıin anasy qyzyna dalaǵa shyǵyp, taza aýamen dem alýǵa keńes bergen. Ata-anasyna renjigen qyz úıden shyǵyp, Pavlodar qalasyna qaraı bet alǵan. Qyzynyń úıde joq ekendigin ata-anasy tek polısııa qyzmetkerlerinen bilgen.
«Bul fakti boıynsha ata-analarymen osyndaı faktilerdi boldyrmaý týraly profılaktıkalyq áńgime júrgizildi», dep atap ótti polısııa ókilderi.
