Eldar Saıtmetov, kishi serjant, shtabtyń aǵa mamany:
– Men Ulttyq ulan qatarynda 2009 jyldan beri qyzmet atqaryp kelemin. Alǵashqy merzimdik áskerı qyzmetimdi О́skemen qalasynda ornalasqan 5518 áskerı bóliminde qarapaıym baılanysshy sarbaz bolyp bastadym. Arnaıy mamandyǵym tis dárigeri bolatyn. Alaıda merzimdik áskerı qyzmetimdi aıaqtaǵan soń, kásibı ásker bolýǵa birjola bet burdym. Shymkent qalasyndaǵy 6506 áskerı bólimine kınolog maman bolyp ornalastym. Sarbaz kezimdegi baılanys tehnıkasyna, baǵdarlamalyq qamtamasyz etý salasyna qyzyǵýshylyǵym artyp, baılanys vzvodyna aýystym. Esepteý tehnıkasy jáne baǵdarlamalyq qamtamasyz etý mamandyǵy boıynsha joǵary bilim aldym. Búginde otbasym, sońymnan ergen eki ulym bar, áıelim medısına salasynyń qyzmetkeri.
Týǵan jerim, ósken ortam barlyǵy da qazaqtar. Yntymaǵy men yrysy jarasqan kóp ulttyń basyn bir ortaǵa jınap, jumaq mekenge aınalǵan bir ǵana Otanym – Qazaqstan dep bilemin. Sondyqtan onyń ózge eldermen birdeı órkendep damýy úshin, ulan-ǵaıyr dalasynyń amandyǵy úshin Ulttyq ulan qatarynda qyzmet ete júrip úles qosyp jatqanyma qýanyshtymyn, óıtkeni bul meniń – adamdyq jáne azamattyq qasıetti paryzym. Men úshin jáne meniń bolashaq urpaǵym úshin eshkimge aıyrbastamaıtyn eń ulyq meken bolǵan, baqytty ǵumyrymnyń máni men sánine aınalǵan Otanyma sheksiz alǵys aıtamyn!
Aleksandr Son, qatardaǵy jaýynger, 3-atqyshtar rotasynyń sarbazy:
– Ultym – koreı. Atam Son Hen Ýk 1960-jyldary Qazaq eline saıası qýǵyn-súrgin kezinde jer aýdarylyp, osynda qonys aýdarǵan eken. Sodan beri biz Jetisý oblysyna qarasty Kálpe degen aýylda turamyz. Atamnyń aıtýynsha alǵash qonys aýdarǵanda turmystarynyń jaqsaryp, sol elge sińisip ketýine kóp kómegin tıgizgen sol aýyldyń Baıbalıevter degen qazaq otbasy bolǵan eken. Ol otbasymen áli kúnge deıin qarym-qatynasymyz úzilgen emes, tipti etene jaqyn baýyrdaı bolyp kettik. Atam ol kisilerge áli kúnge deıin alǵysyn jaýdyryp otyrady. О́zim kez kelgen ulttyń salt-dástúrin etene taný úshin onyń tilin meńgerý qajet dep esepteımin. Qazaq tilin úırený onyń tarıhy men tanymyn túsiný – atamnyń maǵan artqan amanaty. Meniń tilim de, dinim de, janym da – taza qazaq. О́ıtkeni balalyq shaǵymnan qazirge deıin ósken ortam qazaqtar. Mektepti de qazaq tilinde aıaqtadym. Meniń til janashyry bolýyma, mamandyǵymdy qazaq tili men ádebıet salasyna burýyma birden-bir sebep osy desem qatelespeımin. Qazaq ádebıetiniń marjandaryn jatqa oqyp óstim. Talaı kórkemsóz oqý konkýrstarynda qazaq tilinde proza men poezııa oqýdan júldeli oryndardan kórindim.
Qazirgi tańda Ulttyq ulannyń qatarynda memlekettik tildiń janashyry retinde ofıserler quramynda qyzmet etý – basty maqsatym. О́zge ult dep ózegimnen teppeı qaıta baýyryna tartyp, jarqyn bolashaǵyma batyl qadamdar jasaýǵa túrtki bolǵan Qazaq eline, týǵan jerime jáne Ulttyq ulanǵa úlken alǵys aıtamyn.
Olesıa Anısımova, kishi serjant, tehnıkalyq bólimniń is júrgizýshisi:
– Shymkent qalasynda týdym. Osy qalada oqyp, ósip-óndim. Joǵary bilimim bar, mamandyǵym – qarjy qyzmetkeri. 2006 jyldan bastap Ulttyq ulannyń áskerı qyzmetshisimin. Anam – starshına Ekaterına Prıkladovskaıa kadr bóliminde kóptegen jyl áskerı qyzmette bolyp, qazir qurmetti eńbek demalysynda. Anamnyń jolyn qýyp men de 2006 jyly áskerı qyzmetke keldim. Sodan beri 17 jylǵa jýyq ýaqyt aralyǵynda ulandyq jaýyngerlerdiń qatarynda kele jatyrmyn. Otbasym kópultty otbasylardyń qataryna jatady. Otbasymyzda ýkraın, polıak, qytaı, orys, armıan ultynyń ókilderi bar. Bul biz úshin tańsyq emes, óıtkeni Otanymyz Qazaqstan da kóp ulttardyń birligi men yntymaǵy jarasqan ordasy emes pe? Men táýelsiz Qazaqstandy jan-tánimmen jaqsy kóremin. Bizdiń dostarymyz qazaq, áriptesterimiz ázerbaıjan, kórshilerimiz ózbek, týystarymyz armıan, ulttary ózge, biraq bárimizdiń Otanymyz bireý ǵana. Bárimizdi bir múdde, bir maqsatqa jumylýǵa bastaıtyn da osy bir qasıetti sóz – týǵan jer. О́z ómirińde orny erekshe, sheksiz rızashylyǵyń men alǵysyńdy kimge jaýdyrar ediń dese, oılanbastan, týǵan ólkeme, ary men adaldyǵyn bárinen bıik qoıǵan týǵan elime dep aıtar edim.
Elchın Osmanov, 3-atqyshtar rotasynyń starshınasy:
– О́zim áskerı ómirdiń qyzyǵy men qıyndyǵyn 8-synyptan bastap kórdim. Shymkent qalasyndaǵy Sývorov atyndaǵy áskerı mektepke qabyldandym. Sol jerde 11-synypty aıaqtap, Petropavl qalasyndaǵy áskerı ınstıtýttyń kýrsanty atandym. Alaıda taǵdyr solaı boldy, ol jerden ofıserlik shen alyp shyǵý buıyrmady. Biraq jasymadym, áskerı qyzmetimdi kelisimshart boıynsha qyzmetpen jalǵastyrdym. Otbasynda ákemiz er jigittiń tárbıesine qatal qarady. Shynyǵyp, shyńdalyp óstik desem de bolady. Patrıottyq sezim bala kezimizden qalyptasty, er azamatqa Otan qorǵaý, qolyna qarý alyp eline qyzmet etý paryz dep bildik, sodan bolar otbasynda tórt baýyrymnyń barlyǵy da ómirlerin Otan qorǵaý jolyna arnaǵan ofıserler.
Atam Osmanov Feızo 12 jasynda qonystandyrý saıasaty kezinde týǵan-týysqandarymen birge Ońtústiktiń Badam degen eldi mekenine kóship kelgen eken. Sodan beri týǵan jerimiz de, týǵan elimiz de Qazaqstanǵa aınaldy. Atamnyń aıtýynsha, solaqaı saıasattyń qurbany bolyp qazaq dalasyna qonys tepken túrli ult ókilderine qoldaý kórsetip, janashyrlyq tanytqan qarapaıym jurttyń kómegi bizdiń otbasymyzǵa da qıyn kúnderde jaqsylyqqa degen úmit sáýlesin syılaǵan eken. Otbasyndaǵy eresekterge jumys berip, kúndelikti turmys-tirshilikke qajetti as-aýqatymyzben qamtamasyz etken eken. Osylaısha, qazaq ultymen etene baýyrlasyp, jaqyn týysqa aınalǵaly qashan?
Sondaı-aq Alǵys aıtý kúnine oraı Sh.Ýálıhanov atyndaǵy Jambyl oblystyq ámbebap ǵylymı kitaphananyń uıymdastyrýymen «Qurmettiń izgiligi – alǵys» taqyrybynda dóńgelek ústel ótti. Is-sharaǵa ishki ister organdarynyń ardageri, Taraz qalalyq ózbek etnomádenı ortalyǵynyń tóraǵasy Abdýrahman Zaınýtdınov, Aýǵan soǵysynyń ardageri Doǵdyrbaı Botantaev, mádenıet salasynyń ardageri, «Qurmet» ordeniniń ıegeri, «Salalyq mádenıet, sport jáne aqparat qyzmetkerleriniń kásiptik odaǵy» qoǵamdyq birlestigi Jambyl oblystyq fılıalynyń tóraǵasy, sazger Dúısenáli Byqybaev, «Jeltoqsan aqıqaty» patrıottyq qozǵalysynyń Jambyl oblystyq jáne Taraz qalalyq fılıaldarynyń tóraǵasy Sanat Qonarbaev, «Jaýyngerlik erligi úshin» tósbelgisiniń ıesi, 5513 áskerı bólim komandıriniń orynbasary, podpolkovnık Rýstem Saıdýov, III dárejeli «Aıbyn» tósbelgisiniń ıegeri, kishi serjant Danııar Qurmanbaev qatysty. Jıynǵa qatysýshylar san túrli synaqtardan ótken halqymyzdyń yntymaq-birligin aıǵaqtaıtyn erekshe kúni – 1 naýryzdy elimizdiń birligi men dostyǵynyń jarqyn merekesi ekenin aıtyp, barsha halqymyzǵa alǵysyn bildirdi.
